HMS vill vekja athygli á innköllun á Stokke YOYO³ kerrum. Ástæða innköllunar er að bremsan getur losnað skyndilega við notkun, sem getur haft áhrif á öryggi barnsins og skapað slysahættu.  HMS hefur fengið tilkynningu þess efnis að þessar kerrur hafi ekki verið seldar á Íslandi. Þær gætu þó hafa komið til landsins í gegn um erlendar vefverslanir eða verið keyptar erlendis. Innköllunin á ekki við um allar Stokke kerrur heldur einungis ákveðna framleiðslulotu sem hefst á 142AA og er með númeraröð sem er lægri en 0062239.  Ef farið er inn á https://recall.stokke.com/yoyo3 er hægt sjá hvort kerran tilheyri framleiðslulotu sem fellur undir innköllunina og þar má sjá leiðbeiningar um næstu skref.   Í tilkynningunni frá Stokke kemur fram að þeir leggja ríka áherslu á öryggi barna og áreiðanleika sinna vara: „Við viljum tryggja að öll börn sem nota vörur okkar séu örugg. Vörurnar okkar eru hannaðar og prófaðar af kostgæfni til að tryggja að þær uppfylli eða fari fram úr öllum gildandi alþjóðlegum öryggisstöðlum,“ segir í tilkynningu frá Stokke. HMS hvetur alla sem eiga Stokke YOYO³ kerru til að athuga strax hvort hún falli undir innköllunina. Tilkynning um þetta mál má einnig finna á Safety Gate, tilkynningakerfi fyrir hættulegar vörur á EES-svæðinu.

Húsnæðis- og mannvirkjastofnun (HMS) hefur fengið tilkynningu í gegnum tilkynningakerfi Evrópu um innköllun á utanvega hjálmum frá framleiðandanum Polaris. Um er að ræða hjálma af gerðunum 509 FIDLOCK, Tactical 2.0 509 og Tactical 3.0 509, sem seldir hafa verið á vefsíðu polaris.com. Hætta er á að hjálmarnir veiti ekki nægilega vörn við árekstur, sem getur skapað alvarlega hættu á höfuðáverka. HMS hvetur fólk að hætta notkun þeirra strax og hafa samband við sölustað.

HMS hefur borist tilkynning um innköllun á Bibs snudduböndum vegna slysahættu. Um er að ræða 24 blá og fjólublá snuddubönd með lotunúmer B08BBEV og B12BBUT. Snudduböndin voru meðal annars seld á síðunni snud.is og hugsanlega á öðrum stöðum. Ástæða innköllunar er að tréklemman á böndunum getur brotnað í litla hluta. Ef lítið barn setur brotin í munninn getur það valdið köfnunarhættu.   Neytendur sem keypt hafa þessa vöru, hvort sem er í gegn um verslun, vefverslun hérlendis eða erlendis, eru  hvattir til að hætta notkun hennar tafarlaust.

Af þeim 36.939 bílum sem hafa verið innkallaðir á Íslandi vegna hættulegra Takata loftpúða, hafa 5.898 bílar enn ekki skilað sér í innköllun eða um 16 % bíla. Eftir umfjöllun um innköllunina í ágúst sl. jókst ásókn í loftpúðaskipti hjá bílaumboðunum, en enn eru of margir bílar sem ekki hafa verið lagfærðir. Húsnæðis- og mannvirkjastofnun (HMS) hvetur ökumenn eindregið til að hafa tafarlaust samband við viðkomandi umboð. Um er að ræða stærstu ökutækjainnköllun sögunnar þar sem yfir 100 milljón loftpúða hafa verið innkallaðir á heimsvísu. Loftpúðarnir geta við vissar aðstæður valdið því að sprengiflísar kastast inn í farþegarýmið þegar þeir springa út. Vitað er um að minnsta kosti 35 dauðsföll á heimsvísu af völdum loftpúðanna. Hver eru staðan á innkölluninni hjá umboðunum? Á mynd sem fylgir tilkynningunni má sjá frekar stöðuna á innkölluninni. Askja: 4.762 bílar innkallaðir, 1.116 óviðgerðir (23% ólokið), þar á meðal Honda, þar sem alls 649 bílar eru óviðgerðir og 411 Mercedes Benz sendibílar BL: 10.838 bílar innkallaðir, 2822 óviðgerður (26% ólokið). Þar á meðal Subaru, þar eru um 1528 bílar óviðgerðir og 989 bílar af BMW. Brimborg: 1096 bílar innkallaðir, 233 óviðgerðir (26% ólokið), mest hjá Ford Edge og Ford Mustang, alls 81 bíll og 53 bílar óviðgerðir. Hekla: 1.897 bílar innkallaðir, 758 óviðgerðir (40% ólokið), þar á meðal Mitsubishi, þar eru um 414 bílar óviðgerðir og um 261 bílar af Audi. Toyota: 18.346 bílar innkallaðir, 969 óviðgerðir (5% ólokið), mest hjá Yaris, 502 bílar óviðgerðir og Corolla 279 bílar óviðgerðir. Eigendur hvattir til að bregðast strax við Húsnæðis- og mannvirkjastofnun (HMS) minnir ökumenn á að ef þeir eigi bíl sem fellur undir innköllunina, en hafi ekki enn látið skipta út loftpúðanum, þá sé mikilvægt að hafa tafarlaust samband við viðkomandi umboð. Viðgerðin er gerð eigendum að kostnaðarlausu. Innköllunin nær til fleiri bílategunda en þeirra sem birtast í tölfræði upplýsingum frá bílaumboðunum. Innköllunin nær til alla bílategunda sem birtast á lista fyrir neðan. Ef þú átt bíl á þeim lista og bíllinn er frá árgerð 1998 til 2019 þá þarf að bregðast við innkölluninni. Ef bíllinn var ekki fluttur inn af viðkomandi umboði þarf að taka það fram svo umboðið geti athugað hjá framleiðanda hvort loftpúðar í bílnum þínum geti verið hættulegir.  Þetta er öryggismál. Þúsundir bíla eru enn á götunum með þessa hættulegu loftpúða og því þurfa ökumenn að bregðast við innkölluninni sem fyrst.

Húsnæðis- og mannvirkjastofnun (HMS) vekur athygli á hættulegri fingramálningu frá framleiðandanum The KiddoSpace. Grunur leikur á að fingramálningin sé í umferð hér á landi. Um er að ræða fingramálningarsett sem hefur verið seld með mismunandi fjölda lita: 12 litir 25 litir 36 litir Í pakkningunni fylgir einnig bók merkt „Målarbok För Fingerfärg“ eða "Finger Coloring Book". Rannsóknir hafa sýnt að málningin inniheldur óæskileg efni sem geta valdið heilsufarslegri hættu fyrir ung börn við inntöku, snertingu eða innöndun. HMS beinir því til allra eigenda þessarar fingrarmálningar að hætta notkun leikfangsins þegar í stað.

Húsnæðis- og mannvirkjastofnun (HMS) vill vekja athygli á innköllun á Mopitri klifurgrind frá framleiðandanum Ette Tete. Við skoðun kom í ljós að á grindinni getur oddhvöss skrúfa orðið auðveldlega aðgengileg og valdið slysum, auk þess sem varan féll í stöðugleikaprófunum, sem getur skapað fallhættu fyrir börn við notkun. Klifurgrindin var til sölu hjá vefversluninni White Noise hérlendis og hefur nú verið tekin úr sölu. HMS hvetur foreldra og forráðamenn til að taka klifurgrindina tafarlaust úr notkun.  Þeir aðilar sem keyptu vöruna hjá White Noise geta skilað vörunni til þeirra og fengið endurgreitt. Hægt er að hafa samband við White Noise í gegnum tölvupóstfangið whitenoise@wnoise.is

Innköllun á segulkúlum sem seldar voru í verslun Skynörvunar. Hættan sem getur stafað af segulkúlum með of háan segulkraft er sú að þær geta valdið alvarlegum áverkum á meltingarfærum ef þær eru gleyptar, einkum þegar tvær eða fleiri kúlur festast saman í gegnum vef líkamans. Alls hafa verið 57 eintök verið seld hérlendis. Hægt er að skila vörunni og fá hana endurgreidda hjá Skynörvun. Tilkynningu frá Safety Gate má sjá neðst í viðhengi.

Konges Sløjd innkallar tvö hlaupahjól með vörunúmerin KS101544-P00005 og KS101544-P00038. Ástæða innköllunar er slysahætta þar sem hjól getur losnað af hlaupahjólinu. Hlaupahjólin voru seld í verslun Petit. Eigendum er eindregið bent á að hætta notkun strax og skila hjólinu í Petit. Nánari upplýsingar má finna hjá Petit á tenglinum neðst á síðunni.

Innköllun á vatnslitum sem seldir voru í Søstrene Grene frá 12.september 2022. Vatnslitirnir innihalda 12 mismunandi liti en aukið magn af blýi hefur fundist í hvíta litnum sem hefur í för með sér heilsufarsáhættu við snertingu á húð eða inntöku. Alls hafa verið 332 eintök seld í verslunum hérlendis. Hægt er að skila vörunni og fá hana endurgreidda í búðum Søstrene Grene. Nánari tilkynningu frá Søstrene Grene ásamt Safety Gate tilkynningunni má sjá neðst í viðhengi.

HMS barst tilkynning frá Stoðtæki um innköllun á ákveðnum lotum af Petzl fallvarnarbeltum, Newton, Newton Fast og Newton Easyfit. Kemur fram að um sé að ræða fallvarnarbelti (Evrópuútgáfur), sem framleidd voru árið 2022. Innköllunin tengist framleiðslugalla í FAST LT smellum á beltinu sem getur valdið alvarlegri slysahættu. Um leið og innköllunin barst frá Petzl voru viðeigandi kaupendur látnir vita en Stoðtæki mun ítreka erindið við þá sem eiga enn eftir að staðfesta hvort þeirra belti séu innan þeirrar lotu sem um ræðir. Við hvetjum alla sem ekki eru vissir um að hvort að þeirra klifurbelti sé verið að innkalla að hafa samband við Stoðtæki. Hægt er að hafa samband í síma 5109515 eða á smari@explorer.is. Öryggi viðskiptavina þeirra er alltaf í forgangi. Alls hafa verið seld um 11 belti hérlendis. Þessi fallvarnarbelti voru meðal annars seld í Fjallakofanum. Nánari upplýsingar um innköllunina má finna á tenglum hér fyrir neðan.

HMS hefur borist tilkynning í gegnum Safety Gate, evrópskt tilkynningakerfi fyrir hættulegar neytendavörur á EES-svæðinu, sem ætlað er að miðla upplýsingum milli eftirlitsstofnana innan svæðisins. Tilkynningin kemur frá sænskum yfirvöldum og varðar barnavögguna Moonboon Baby Hammock, framleidd af danska fyrirtækinu Moonboon International ApS. Í tilkynningunni kemur fram að sænsk yfirvöld telji ákveðna hönnunarþætti vöggunnar geta skapað hættu fyrir ung börn, þar á meðal: ·       Of mikill halli og innra yfirborð þar sem barnið liggur er sveigt sem getur valdið því að þegar barnið veltir sér, festist það og eigi erfitt með öndun. ·       Ófullnægjandi hliðar sem mögulega gera það að verkum að barn geti fallið úr vöggunni. ·       Aðgengilegar snúrur sem, ef samsetning er ekki rétt, gætu skapað kyrkingarhættu. Samkvæmt upplýsingum frá framleiðanda hafnar Moonboon International ApS því að varan sé hættuleg. Þeir vísa til þess að vaggan hafi verið hönnuð með öryggi í huga og standist þeirra eigin öryggismat. Vaggan hefur verið seld í gegnum erlendar netverslanir, þar á meðal babyland.se, og hefur einnig fundist á mörkuðum í öðrum löndum, s.s. Austurríki. Á Íslandi hefur salan verið stöðvuð þar til frekari skýringar liggja fyrir. HMS mun áfram fylgjast með málinu í samstarfi við erlendar eftirlitsstofnanir og mun upplýsa neytendur um framvindu málsins eftir því sem upplýsingar berast. Fyrir neðan má sjá tilkynningu um málið í Safety Gate.

Þekkir þú sögu Takata loftpúða innkallana? Um er að ræða stærstu innköllun vegna ökutækja frá upphafi en yfir 100 milljóna loftpúða hafa verið innkallaðir alls staðar í heiminum. Það er ekki að ástæðulausu að bílarnir voru innkallaðir en við vissar aðstæður harðnar duft sem á að liðka fyrir að loftpúðinn springi út. Þegar loftpúðinn springur myndar þetta duft sprengiflísar sem springa framan í fólk. Vitað er um 35 dauðsföll um allan heim vegna þessa. Innköllunin gæti átt við um eftirfarandi bílategundir sem framleiddar voru frá 1998 til 2019. Acura, Audi, BMW, Cadillac, Citroën, Chevrolet, Chrysler, Daimler, Dodge/Ram, Ferrari, Ford, GMC, Honda, Infiniti, Jaguar, Jeep, Land Rover, Lexus, Lincoln, Mazda, McLaren, Mercedes-Benz, Mercury, Mitsubishi, Nissan, Pontiac, Saab, Saturn, Scion, Subaru og Toyota Þessar innkallanir eiga líka við á Íslandi og er eitthvað um að bílar hafi ekki skilað sér í innkallanir hérlendis. Ef þú átt eldri bíl sem passar við lýsingu hér að ofan og ert óviss um hvort bíllinn þinn hafi verið innkallaður skaltu hafa samband við viðeigandi umboð og leita ráða. Ef þú hefur hunsað tilkynningu umboða um innköllun skaltu hafa samband strax og bóka tíma þér að kostnaðarlausu.