HMS vekur athygli á innköllun á hættulegu leikfangi, barnahristu, sem getur valdið köfnunarhættu. Leikfangið er úr viði, getur verið í ýmsum litum og er með handfangi sem er um 11 cm langt. Barn getur sett handfangið, sem er langt, upp í munninn á sér sem getur valdið köfnun. Leikfangið var selt í gegnum netverslunina Wish og talið er að það sé í umferð hérlendis. Varan stóðst ekki prófun samkvæmt evrópska staðlinum EN 71-1 og er ekki í samræmi við kröfur leikfangatilskipunarinnar (Toy Safety Directive 2009/48/EC). Eigendur leikfangsins eru hvattir til að hætta notkun leikfangsins strax og setja það í förgun.

HMS hefur borist tilkynning frá Fjallakofanum um innköllun á ákveðnum Petzl ísöxum vegna hættu á að handfangið brotnar. Samkvæmt tilkynningunni frá Petzl hafa komið upp nokkur tilfelli þar sem þessar ísaxar brotnuðu í handfanginu, sem getur skapað verulega hættu á alvarlegum meiðslum eða dauðaslysi.  Í tilkynningunni kemur fram að tilteknar framleiðslulotur uppfylla ekki kröfur um endingu, sérstaklega við krefjandi notkun í ísklifri og þurrverkfæraklifri/bísklifri („e.dry tooling“). Bilunin getur komið án fyrirvara og án sýnilegra merkja. Af þessum ástæðum biður Petzl alla notendur um að hætta strax að nota ísaxir sem kunna að falla undir innköllunina. Ísaxir sem um er að ræða: NOMIC (U021AA00) framleiddar frá desember 2017 til júní 2020. ERGONOMIC (U022AA00) framleiddar frá júní 2018 til desember 2021.  Vinsamlegast fylgið leiðbeiningum á heimasíðu Petzl til að athuga hvort ykkar ísöxi sé innan þeirra raða sem innköllunin nær til og, ef svo er, til að fá nýtt skaft í staðinn. Fjallakofinn hvetur eigendur ísaxa sem falla undir innköllunina til að bregðast skjótt við og fara í gegnum ferlið beint hjá framleiðanda. Petzl er til taks fyrir allar frekari spurningar.

HMS hefur borist tilkynning frá Heklu um innköllun á Skoda Kodiaq, árgerð 2025, og VW Amarok, árgerð 2025. Skoda Kodiaq er innkallaður vegna hættu á að hvöss brún í sætisgrind geti skemmt hliðarloftpúða ef hann springur út við árekstur. Því er vörn farþega minni en ætla mætti í árekstri. Mun Hekla setja hlíf á brúnir sætisgrindar svo loftpúðinn geti blásið eðlilega út gerist þess þörf. VW Amarok er innkallaður þar sem rafstýrð hemlunaraðstoð gæti hætt að virka. Ef bilun verður kemur viðvörun í mælaborð, bremsupetali verður þungur og erfitt verður að mynda nægilegan kraft til að hemla. Þetta veldur lengri hemlunarvegalengd og eykur slysahættu. Hekla mun uppfæra hugbúnað sem leysir vandamálið.

HMS hefur borist tilkynning frá Öskju varðandi innköllun á tveimur tegundum af Honda felgum sem seldar voru sem felguuppfærsla með nýjum Honda Civic bílum frá árinu 2017 - 2021. Ástæðan fyrir innkölluninni er sú að mögulega voru felgurnar framleiddar án stálpressuhólka og því sé hætta á minna herslutogi felguróa. Það þýðir að hætta sé á að hjól fari undan bíl á ferð með tilheyrandi slysahættu. Mun Askja skipta út felgum, felguboltum, felguróm eins og við á í hvert skipti og hjólastilla bílinn. Þeir sem eiga Honda Civic frá árinu 2017-2021 eru beðnir að senda tölvupóst á askja@askja.is með mynd af felgunum ásamt bílnúmeri. Samkvæmt Öskju fylgdu þessar felgur ekki ökutækjum sem hafa verið keypt af Öskju heldur eingöngu Bernhard, sem var með Honda umboðið áður.

Húsnæðis- og mannvirkjastofnun vekur athygli á innköllun á tilteknum skíðaskóm frá HEAD. Everest flytur inn skó frá HEAD en þær framleiðslulotur sem um ræðir í þessari innköllun voru ekki til sölu hjá fyrirtækinu. Hins vegar tók Everest fjögur pör af skíðaskóm úr umferð í skíðaleigu sinni í kjölfar innköllunarinnar. Um er að ræða skíðaskó í öllum stærðum sem framleiddir voru á árunum 2016–2022. Innköllunin nær til framleiðslulota númer 601113, 601150, 602113, 602124, 602127, 606616, 607056, 607311, 607335, 607337, 608033, 608113 og 609060. Umræddar gerðir eru ADVANT EDGE 105, ADVANT EDGE 85 R, FORMULA 120, FORMULA 120 GW, FORMULA RS 120, FORMULA RS 120 GW, NEXT EDGE 85HT, RAPTOR 40HT, RAPTOR 50HT, VECTOR 130 RS og VECTOR EVO ST. Ástæða innköllunarinnar er sú að rifur og sprungur geta myndast í efninu á líftíma vörunnar. Slíkar skemmdir geta leitt til þess að notandi missi stjórn á skíðum sínum, sem eykur hættu á falli og meiðslum. Varan uppfyllir ekki kröfur sem gerðar eru samkvæmt almennu vöruöryggisreglugerðinni (General Product Safety Regulation). Framleiðandi ákvað að innkalla vöruna frá neytendum. Neytendur sem eiga umrædda skíðaskó eru hvattir til að hætta notkun þeirra tafarlaust og kynna sér nánari upplýsingar og leiðbeiningar á vef framleiðanda: https://www.head.com/de_AT/recalls

Umhverfis- og orkustofnun vekur athygli á því að Garðheimar gróðurvörur ehf. hafa innkallað Húsa- og garðaúða í 400 ml málmúðabrúsum. Framleiðslunúmerið er: P31396. Ástæða innköllunarinnar er að botninn á umbúðum vörunnar er ekki þéttur og getur vökvinn lekið út. Varan er hættuleg umhverfinu og skaðleg lífi í vatni. Umbúðir sem leka auka áhættuna á að innihaldið berist í niðurföll og þaðan út í umhverfið. Garðheimar gróðurvörur ehf. beina því til neytenda sem keypt hafa vöruna að skila henni á næsta sölustað eða til Garðheima, Álfabakka 6, 109 Reykjavík og fá endurgreitt.

Húsnæðis- og mannvirkjastofnun (HMS) vekur athygli á innköllun frá IKEA á ákveðnum tegundum af NYMÅNE veggljósum. Vegna framleiðslugalla eru rafmagnsvírar ekki nægilega vel einangraðir, sem getur skapað hættu á rafstuði. Hægt er að sjá hvort varan falli undir innköllunina á dagstimpli og framleiðandanúmeri ljósanna. Vörur sem umræðir eru: -  NYMÅNE veggljós/lesljós, hvítt. Vörunúmer: 203.569.09 -  NYMÅNE veggljós/lesljós, kolgrátt. Vörunúmer: 504.152.24 Eftirtaldir dagstimplar (ÁÁVV) falla undir innköllunina: Frá 2217 til 2550 (frá viku 17, 2022 til viku 50, 2025) frá framleiðanda númer 23241. Hægt er að finna dagstimpil og framleiðandanúmer á límmiða inni í lampaskerminum en athugið að taka þarf ljósaperuna úr til að sjá númerin .Viðskiptavinir skulu alltaf taka vegglampann úr sambandi áður er þeir handleika hann. Eigendur ljósana eru hvattir til að taka þau strax úr umferð og hafa samband við IKEA til að fá nýja vöru eða endurgreiðslu. Nánari upplýsingar eru veittar í þjónustuveri í síma 520 2500 og á IKEA.is. Athugið að vörur með dagstimpla fyrir 2217 og eftir 2550 eða með öðru framleiðandanúmeri falla ekki undir innköllunina.

Tulipop innkallar millistykki sem fylgja Tulipop LED lömpunum. Komið hefur í ljós öryggisgalli í USB millistykkjunum. Það getur stafað af þeim hætta þar sem styrkleiki hleðslutækisins er ekki fullnægjandi. Við ákveðið átak getur sá hluti þess sem pinnarnir, sem stungið er í tengil brotnað af og orðið eftir í tenglinum, sem getur skapað hættu á raflosti.    Eigendur Tulipop LED lampa eru hvattir til að hætta notkun á gömlu millistykkjunum og farga þeim. Hægt er að panta nýtt USB-millistykki hér. Það er sent án endurgjalds á næsta Dropp afhendingarstað. Ef óskað er eftir frekari upplýsingum má hafa samband í gegnum tölvupóst: tulipop@tulipop.com

HMS vill vekja athygli á barnahjólreiðasæti, ætlað börnum með hámarksþyngd 22 kg, hefur verið tekið af markaði vegna alvarlegrar öryggisáhættu. Varan hefur verið seld á netinu, þar á meðal í gegnum Amazon (ASIN: B08L3Y8L48). Rannsókn leiddi í ljós að festi- og öryggiskerfi sætisins er ófullnægjandi. Af þeim sökum er hætta á að barn geti dottið úr sætinu við notkun, sem getur leitt til meiðsla. Varan uppfyllir hvorki kröfur almennu vöruöryggisreglugerðarinnar (GPSR) né evrópska staðalsins EN 14344, sem gilda um öryggi barnahjólreiðasæta. Sætið er framleitt í Portúgal og er pakkað í gagnsæjan plastpoka. Yfirvöld hafa fyrirskipað bann við markaðssetningu vörunnar, auk annarra tilheyrandi aðgerða, gagnvart smásala. Bannið tók gildi 18. desember 2025. Neytendur sem eiga viðkomandi barnahjólreiðasæti eru hvattir til að hætta notkun þess tafarlaust og hafa samband við söluaðila til að fá nánari upplýsingar um endurgreiðslu eða önnur úrræði. Öryggi barna er í forgangi og er þessi aðgerð liður í því að tryggja að einungis öruggar og reglugerðarsamræmdar vörur séu í umferð á Evrópumarkaði.

HMS barst tilkynning frá tilkynningakerfi Evrópu, (Safety Gate) um að verið væri að innkalla brúsa frá Done by Deer sem heita Gourde Tiny Farm. Brúsarnir eru ljósbláir og bleikir með myndum af dýrum. Módel númerin eru 1056381 og 1056392. Hætta er á að ól sem er á brúsanum geti losnað og bandið valdið því að barnið getur kyrkst. Done by Deer er þegar byrjað að auglýsa innköllun vörunnar og mikilvægt er að farga þeim eintökum sem eru í umferð. HMS hvetur alla sem eiga vöruna til að hætta notkun hennar strax og hafa samband við seljanda eða framleiðanda til að skila og fá endurgreiðslu á vörunni.

Toyota hefur sent HMS tilkynningu um innköllun á Toyota Prius bílum, framleiddum á árunum 2023 til 2025. Ef hurð er lokað harkalega eftir mikið vatnsaustur getur orðið skammhlaup í rafmagns læsingabúnaði afturhurðanna. Ef þær eru ólæstar gætu þær því opnast á ferð með tilheyrandi hættu á slysum. Er talin sérstök hætta á að þetta gerist eftir þvott á bílaþvottastöðum. Toyota mun senda eigendum bréf og skipta um viðeigandi búnað í bílunum.

HMS barst tilkynning frá bílaumboðinu Öskju um innköllun á Mercedes Benz, gerðum 206, 236 og 294. Samkvæmt Öskju eiga viðkomandi bílar að vera búnir búnaði sem skynjar skyndilegan og alvarlegan heilsubrest ökumanns, sá búnaður kemur í veg fyrir að ökumaðurinn geti stýrt bílnum. Í þeim eintökum sem innköllunin nær til virkar þetta öryggiskerfi ekki sem skyldi, sem eykur líkur á árekstri við slíkar aðstæður. Askja mun uppfæra hugbúnað sem lagar gallann. Askja mun hafa samband við eigendur umræddra ökutækja. Eigir þú Mercedes Benz af gerð 206, 236 eða 294 og hefur ekki fengið boð um innköllun, er mælt með því að þú hafir samband við Öskju til að kanna hvort ökutækið þitt sé hluti af innkölluninni.