Tulipop innkallar millistykki sem fylgja Tulipop LED lömpunum. Komið hefur í ljós öryggisgalli í USB millistykkjunum. Það getur stafað af þeim hætta þar sem styrkleiki hleðslutækisins er ekki fullnægjandi. Við ákveðið átak getur sá hluti þess sem pinnarnir, sem stungið er í tengil brotnað af og orðið eftir í tenglinum, sem getur skapað hættu á raflosti.    Eigendur Tulipop LED lampa eru hvattir til að hætta notkun á gömlu millistykkjunum og farga þeim. Hægt er að panta nýtt USB-millistykki hér. Það er sent án endurgjalds á næsta Dropp afhendingarstað. Ef óskað er eftir frekari upplýsingum má hafa samband í gegnum tölvupóst: tulipop@tulipop.com

HMS vill vekja athygli á barnahjólreiðasæti, ætlað börnum með hámarksþyngd 22 kg, hefur verið tekið af markaði vegna alvarlegrar öryggisáhættu. Varan hefur verið seld á netinu, þar á meðal í gegnum Amazon (ASIN: B08L3Y8L48). Rannsókn leiddi í ljós að festi- og öryggiskerfi sætisins er ófullnægjandi. Af þeim sökum er hætta á að barn geti dottið úr sætinu við notkun, sem getur leitt til meiðsla. Varan uppfyllir hvorki kröfur almennu vöruöryggisreglugerðarinnar (GPSR) né evrópska staðalsins EN 14344, sem gilda um öryggi barnahjólreiðasæta. Sætið er framleitt í Portúgal og er pakkað í gagnsæjan plastpoka. Yfirvöld hafa fyrirskipað bann við markaðssetningu vörunnar, auk annarra tilheyrandi aðgerða, gagnvart smásala. Bannið tók gildi 18. desember 2025. Neytendur sem eiga viðkomandi barnahjólreiðasæti eru hvattir til að hætta notkun þess tafarlaust og hafa samband við söluaðila til að fá nánari upplýsingar um endurgreiðslu eða önnur úrræði. Öryggi barna er í forgangi og er þessi aðgerð liður í því að tryggja að einungis öruggar og reglugerðarsamræmdar vörur séu í umferð á Evrópumarkaði.

HMS barst tilkynning frá tilkynningakerfi Evrópu, (Safety Gate) um að verið væri að innkalla brúsa frá Done by Deer sem heita Gourde Tiny Farm. Brúsarnir eru ljósbláir og bleikir með myndum af dýrum. Módel númerin eru 1056381 og 1056392. Hætta er á að ól sem er á brúsanum geti losnað og bandið valdið því að barnið getur kyrkst. Done by Deer er þegar byrjað að auglýsa innköllun vörunnar og mikilvægt er að farga þeim eintökum sem eru í umferð. HMS hvetur alla sem eiga vöruna til að hætta notkun hennar strax og hafa samband við seljanda eða framleiðanda til að skila og fá endurgreiðslu á vörunni.

Toyota hefur sent HMS tilkynningu um innköllun á Toyota Prius bílum, framleiddum á árunum 2023 til 2025. Ef hurð er lokað harkalega eftir mikið vatnsaustur getur orðið skammhlaup í rafmagns læsingabúnaði afturhurðanna. Ef þær eru ólæstar gætu þær því opnast á ferð með tilheyrandi hættu á slysum. Er talin sérstök hætta á að þetta gerist eftir þvott á bílaþvottastöðum. Toyota mun senda eigendum bréf og skipta um viðeigandi búnað í bílunum.

HMS barst tilkynning frá bílaumboðinu Öskju um innköllun á Mercedes Benz, gerðum 206, 236 og 294. Samkvæmt Öskju eiga viðkomandi bílar að vera búnir búnaði sem skynjar skyndilegan og alvarlegan heilsubrest ökumanns, sá búnaður kemur í veg fyrir að ökumaðurinn geti stýrt bílnum. Í þeim eintökum sem innköllunin nær til virkar þetta öryggiskerfi ekki sem skyldi, sem eykur líkur á árekstri við slíkar aðstæður. Askja mun uppfæra hugbúnað sem lagar gallann. Askja mun hafa samband við eigendur umræddra ökutækja. Eigir þú Mercedes Benz af gerð 206, 236 eða 294 og hefur ekki fengið boð um innköllun, er mælt með því að þú hafir samband við Öskju til að kanna hvort ökutækið þitt sé hluti af innkölluninni.

HMS barst tilkynning frá Brimborg um innköllun á Ford E-Transit sendiferðabíl, árgerðum 2021-2025. Hætta er á að gas geti lekið úr 12 volta rafgeymi bílsins inn í farþegarýmið. Innöndun gassins getur leitt til heilsukvilla og valdið slysum. Brimborg hefur pantað varahluti og mun í kjölfarið senda bréf til eiganda þeirra ökutækja sem þarf að innkalla. Finnur þú sýrulykt, lykt af rotnandi eggjum í farþegarými, heyrir suðhljóð, verður var við sýnilegt gasútstreymi frá rafgeymi eða óeðlilegan hita í sætum, er eigendum ráðlagt að hafa samband við Brimborg sem fyrst.

HMS barst tilkynning frá BL vegna innköllunar á Hyundai Kona 2018-2023 og Renault Kangoo III SOP 2025. Hyundai Kona (árgerðir 2018–2023) Ástæðan er galli í stjórnborði rafhlöðunnar. Við innköllun mun BL lesa villukóða, uppfæra hugbúnað og jafnframt athuga hvort þörf sé á að skipta um rafhlöðustýringu. Renault Kangoo III (framleiðsluár 2025) Á bifreiðunum vantar hlíf á mótstykki læsingar á afturhurð, sem getur valdið hættu á höfuðáverkum. Við innköllun mun BL koma fyrir hlíf á mótstykki hurðarlæsinga. BL mun hafa samband við eigendur bifreiðana.

HMS hefur borist tilkynning frá BL um innköllun á Subaru Solterra 2023-2025, Hyundai Ioniq6 2022-2025, Range Rover Evoque 2020-2025 og Jaguar E-Pace 2021-2024. Subaru Solterra ökutækin eru innkölluð vegna galla í bílastæðaaðstoð. Bakkmyndavél getur frosið eða birtist ekki við tilteknar aðstæður. Mun BL endurforrita stjórntölvuna til að laga gallann. Hyundai Ioniq6 ökutækin eru innkölluð vegna þess að ytri hleðslulok getur dottið af í akstri og skapað hættu fyrir aðra umferð. BL mun festa hleðslulok örugglega á bílinn. Range Rover Evoque og Jaguar ökutækin eru innkölluð vegna þess að loftpúði farþega megin var ranglega brotinn saman við samsetningu. Verði árekstur geta loftpúðarnir rifnað og veita því ekki þá vörn sem þeir eiga að gera auk þess sem heitt gas getur brennt farþega. BL mun skipta um loftpúða.

Húsnæðis- og mannvirkjastofnun (HMS) varar við notkun festinga í bergi (e. anchor) af gerðinni Petzl Longlife Type 1, sem ætluð eru til varanlegrar uppsetningar á klifursvæðum. Komið hefur í ljós að burðarþol festinganna er ófullnægjandi og uppfylla þær ekki kröfur sem gerðar eru til fallvarna. Notkun festinganna getur leitt til þess að þær þoli ekki fall, sem getur haft í för með sér alvarleg meiðsl eða lífshættuleg slys. Festingarnar voru settar á markað á árunum 1988–1991 og eru framleiddar í Frakklandi. HMS hvetur eigendur og umsjónaraðila klifursvæða til að kanna hvort slíkar festingar séu enn í notkun og fjarlægja þær tafarlaust ef þær finnast. Klifrarar eru jafnframt hvattir til að sýna aðgát og forðast notkun eldri eða óþekktra festinga þar sem burðarþol og uppruni eru óviss. Sjá nánari tilkynningu frá Safety Gate og einnig upplýsingar á vefsíðu framleiðanda.

Húsnæðis- og mannvirkjastofnun (HMS) barst tilkynning í gegnum evrópska eftirlitskerfið Safety Gate um að tilteknar lotur frá CURAPROX snuðum innihaldi of háan styrk af bisfenóli A (BPA) sem getur haft áhrif á hormónastarfsemi. Innköllunin á aðeins við um lotur 006, 007, 008, 009, 010, 011 sem eru merktar á snuðunum. Icepharma tók snuðin úr sölu í nóvember 2024 og því nær innköllunin aðeins til neytenda. Snuðin voru seld í mismunandi litum bláum, bleikum, kóral og turkisbláum. Snuðin hafa fengist m.a. í apótekum hérlendis en innflutningsaðili vörunnar er Icepharma. Varan var prófuð með tilliti til gildandi lagaákvæða og evrópskra staðla og reyndist ekki uppfylla kröfur laga nr. 134/1995  um öryggi vöru og opinbera markaðsgæslu og út frá REACH reglugerðinni (EB nr. 1907/2006). Í ljósi þessarar niðurstöðu er talið nauðsynlegt að innkalla vöruna tafarlaust og tryggja að hún sé ekki lengur til sölu eða í notkun. Öryggi og velferð barna er í algjörum forgangi og eru neytendur hvattir til að hætta notkun vörunnar strax. Framleiðandinn hefur gefið út frekari upplýsingar varðandi innköllunina.

Húsnæðis- og mannvirkjastofnun (HMS) vill vara forráðamenn barna við mögulegri hættu sem fylgt getur notkun á snudduböndum sem innihalda viðarklemmur eða aðra viðaríhluti. Stofnuninni hefur borist nokkrar tilkynningar um að slíkar viðarklemmur hafi brotnað við notkun. Í þeim málum sem komið hafa til skoðunar virðist viðurinn hafa morknað eða brotnað.   Viður er náttúrulegt efni sem bólgnar, mýkist og veikist þegar hann blotnar eða verður fyrir endurteknum raka, til dæmis frá slefi. Þegar þetta gerist geta:  trefjarnar mýkst efnið veikst yfirborðið morknað  sprungið eða brotnað  Ef viður er ekki sérstaklega húðaður, lakkaður eða meðhöndlaður fyrir raka  verður hann mun viðkvæmari fyrir sliti og morknun. Brot úr viðarklemmum geta valdið köfnunarhættu fyrir ung börn ef þau losna af snuddubandinu.  HMS hvetur foreldra og forráðamenn eindregið til að:  Yfirfara snuddubönd með viðarhnöppum eða viðarklemmum reglulega og athuga hvort merki séu um sprungur, molnun eða aðrar skemmdir Hætta undir eins notkun ef merki um minnstu skemmdir finnast eða ef óvissa vaknar er um öryggi vörunnar  Tilkynna til HMS ef grunur vaknar um óörugga vöru eða ef snudduband brotnar  Öryggi barna er í fyrirrúmi og vill HMS minna á mikilvægi þess að fylgjast reglulega með ástandi allra snuddubanda og smábarnaáhalda til að tryggja örugga notkun. 

Húsnæðis- og mannvirkjastofnun (HMS) varar neytendur við tveimur gerðum snuddubanda frá verslunarkeðjunni Primark. Snudduböndin hafa verið innkölluð vegna alvarlegra öryggisgalla. Snudduböndin voru seld tvö í pakka og eru með mismunandi mynstri eins og böngsum, loftbelgum eða lömbum. Við skoðun kom í ljós að snudduböndin uppfylla ekki lágmarkskröfur um öryggi. Band snuddubandanna er of langt og getur því vafist um háls barns, sem getur valdið kykingarhættu. Jafnframt er klemman á snudduböndunum án nauðsynlegra loftræstingargata sem eiga að tryggja öryggi ef hlutar vörunnar lenda í munni barns. Skortur á slíkum götum eykur hættu á köfnun. HMS hvetur alla sem kunna að eiga umrædd snuddubönd til að hætta notkun þeirra þegar í stað og skila þeim til seljanda.