HMS hefur borist tilkynning í gegnum Safety Gate, evrópskt tilkynningakerfi fyrir hættulegar neytendavörur á EES-svæðinu, sem ætlað er að miðla upplýsingum milli eftirlitsstofnana innan svæðisins. Tilkynningin kemur frá sænskum yfirvöldum og varðar barnavögguna Moonboon Baby Hammock, framleidd af danska fyrirtækinu Moonboon International ApS. Í tilkynningunni kemur fram að sænsk yfirvöld telji ákveðna hönnunarþætti vöggunnar geta skapað hættu fyrir ung börn, þar á meðal: ·       Of mikill halli og innra yfirborð þar sem barnið liggur er sveigt sem getur valdið því að þegar barnið veltir sér, festist það og eigi erfitt með öndun. ·       Ófullnægjandi hliðar sem mögulega gera það að verkum að barn geti fallið úr vöggunni. ·       Aðgengilegar snúrur sem, ef samsetning er ekki rétt, gætu skapað kyrkingarhættu. Samkvæmt upplýsingum frá framleiðanda hafnar Moonboon International ApS því að varan sé hættuleg. Þeir vísa til þess að vaggan hafi verið hönnuð með öryggi í huga og standist þeirra eigin öryggismat. Vaggan hefur verið seld í gegnum erlendar netverslanir, þar á meðal babyland.se, og hefur einnig fundist á mörkuðum í öðrum löndum, s.s. Austurríki. Á Íslandi hefur salan verið stöðvuð þar til frekari skýringar liggja fyrir. HMS mun áfram fylgjast með málinu í samstarfi við erlendar eftirlitsstofnanir og mun upplýsa neytendur um framvindu málsins eftir því sem upplýsingar berast. Fyrir neðan má sjá tilkynningu um málið í Safety Gate.

Þekkir þú sögu Takata loftpúða innkallana? Um er að ræða stærstu innköllun vegna ökutækja frá upphafi en yfir 100 milljóna loftpúða hafa verið innkallaðir alls staðar í heiminum. Það er ekki að ástæðulausu að bílarnir voru innkallaðir en við vissar aðstæður harðnar duft sem á að liðka fyrir að loftpúðinn springi út. Þegar loftpúðinn springur myndar þetta duft sprengiflísar sem springa framan í fólk. Vitað er um 35 dauðsföll um allan heim vegna þessa. Innköllunin gæti átt við um eftirfarandi bílategundir sem framleiddar voru frá 1998 til 2019. Acura, Audi, BMW, Cadillac, Citroën, Chevrolet, Chrysler, Daimler, Dodge/Ram, Ferrari, Ford, GMC, Honda, Infiniti, Jaguar, Jeep, Land Rover, Lexus, Lincoln, Mazda, McLaren, Mercedes-Benz, Mercury, Mitsubishi, Nissan, Pontiac, Saab, Saturn, Scion, Subaru og Toyota Þessar innkallanir eiga líka við á Íslandi og er eitthvað um að bílar hafi ekki skilað sér í innkallanir hérlendis. Ef þú átt eldri bíl sem passar við lýsingu hér að ofan og ert óviss um hvort bíllinn þinn hafi verið innkallaður skaltu hafa samband við viðeigandi umboð og leita ráða. Ef þú hefur hunsað tilkynningu umboða um innköllun skaltu hafa samband strax og bóka tíma þér að kostnaðarlausu.

Anker Innovations tilkynna innköllun á nokkrum gerðum hleðslubanka vegna mögulegra öryggisgalla. Fyrr á árinu tóku Anker til notkunar endurbætt öryggiseftirlit við framleiðslu Anker tækja til þess að koma auga á mögulega öryggisgalla fyrr í framleiðsluferlinu. Þessar endurbætur leiddu í ljós hugsanlegt vandamál hvað varðar lithium rafhlöður frá ákveðnum framleiðanda. Þrátt fyrir að bilunaráhætta sé í lágmarki, hefur Anker valið að tilkynna innköllun á einstökum gerðum Anker hleðslubanka til varúðarráðstöfunar. Innköllunin nær til 5 vörunúmera. Vörunúmerin sem verið er að innkalla eru eftirfarandi: A1257, A1681, A1689, A1647 og A1652. Hleðslubankarnir voru seldir í Heimilistækjum. Hægt er að sjá frekari tilkynningu frá HT fyrir neðan en einnig má sjá tilkynningu frá Anker, hér. Eigendur hleðslubankanna geta haft samband við HT í gegnum netfangið sala@ht.is.

Undanfarin misseri hafa íslensku fjarskiptafyrirtækin unnið að því að loka eldri gerðum farsímaneta hér á landi, þ.e. hinum svonefndu 2G og 3G netum. Áætlað er að í árslok 2025 verði búið að loka þeim endanlega. Þá munu 4G og 5G kerfi verða ráðandi farsímakerfi á Íslandi. Mörg fjarskiptatæki á neytendamarkaði hafa einungis nýtt 2G og 3G tæknina og gera enn t.d. farsímar, snjallúr og ýmis vöktunartæki. Þessi tæki munu hætta að virka næstu áramót Þá bendir Fjarskiptastofa á að sumir farsímar geta líka hætt að virka þrátt fyrir að þeir hafi verið markaðssettir og seldir sem 4G-samhæfðir. Ástæðan er sú framleiðendur farsíma þurfa að virkja VoLTE tæknina sérstaklega fyrir Ísland og fyrir hverja tegund farsíma og ekki er öruggt að það hafi alltaf verið gert. Það er því ekki alltaf nægjanlegt að það standi VoLTE samhæfður á kassanum sem farsíminn er seldur í svo hann virki hér á landi. Fjarskiptastofa bendir fólki á að kanna stöðu fjarskiptatækja sinna og gera nauðsynlegar ráðstafanir í tíma ef nauðsynlegt er.    

Ikea innkallar VÄRDEFULL hvítlaukspressu. Hætta er á að lítil málmstykki losni við notkun og komist í matvæli. Hvítlaukspressan er með svart handfang með dagstimplum frá 2411 (YYWW) til 2522 (YYWW). Hægt er að þekkja þær vörur sem falla undir þessa innköllun á IKEA myndmerkinu á efri hluta handfangsins eins og sést á mynd 2 sem fylgir fréttinni.                                                     IKEA biður alla viðskiptavini sem eiga svarta IKEA 365+ hvítlaukspressu til að taka hana úr umferð og skila í IKEA. Þessi vara hefur verið seld á númerunum 201.521.58, 305.781.89 og 601.636.02 um allan heim.

Geislavarnir ríkisins vekja athygli á innköllun á vörunni Quantum Shield – Nano technology. Um er að ræða límmiða sem framleiddir eru af Fan Yun Craft Electronics Co í Kína. Varan inniheldur geislavirkt efni í litlu magni og ef límmiðarnir eru upp við húð valda þeir óþarfa geislun á fólk. Geislun frá geislavirkum efnum getur valdið skaða á fólki og aukið líkur á krabbameini Innflutnings- og söluaðili hefur innkallað vöruna en öllum seldum vörum hefur ekki verið skilað til baka. Samtals voru 30 stykki flutt inn og voru  límmiðarnir til sölu í versluninni JK vörur á tímabilinu frá júlí til desember árið 2023. Mögulega hefur fólk keypt þessa límmiða annarstaðar, t.d. eru þessir límmiðar til sölu á AliExpress og Temu. Geislavarnir ríkisins ráðleggja þeim sem eiga þessar vöru að hætta að nota þær og koma með vöruna til Geislavarna ríkisins að Rauðarárstíg 10, 4. hæð. Ekki má farga vörunni eftir venjulegum leiðum með  heimilssorpi. 

Húsnæðis- og mannvirkjastofnun (HMS) vekur athygli á innköllun á koppafeitisbyssu frá Makita. Hættan sem fylgir notkun tækisins er að slangan á tækinu getur gefið sig og koppafeiti sprautast út við háan þrýsting. Nokkur tilvik hafa verið tilkynnt vegna meiðsla á fingrum við notkun tækisins. Makita býður eigendum að skipta út slöngunni til að koma í veg fyrir frekari slys. Varan var seld hjá Þór HF en hugsanlega einnig á fleiri stöðum. Hægt er að hafa samband við verslunina Þór hf. í gegnum tölvupóstin thor@thor.is fyrir frekari upplýsingar varðandi nýja slöngu.

Vakin er athygli á innköllun á grímubúningi sem lítur út eins og franskar kartöflur. Búningurinn er talinn hættulegur þar sem hann er mjög eldfimur og uppfyllir ekki öryggiskröfur leikfangastaðalsins EN 71-2. Búningurinn var seldur í Partýbúðinni. Viðskiptavinum er bent á að hætta notkun búningsins strax. Hægt er að skila búningnum í Partýbúðina gegn fullri endurgreiðslu.

Vakin er athygli á innköllun á ungbarnarólu, Baby Swing Black frá KREA/Happy Summer. Barnarólan uppfyllir ekki þær kröfur sem gerðar eru til slíkra róla. Helstu áhættur sem fylgja notkun hennar eru að barn getur fest höfuð og háls á milli hluta rólunnar. Þá er á rólunni smáhlutur sem getur brotnað af og valdið köfnunarhættu. Einnig voru önnur atriði sem stóðust ekki leikfangastaðal EN 71-1 og EN 71-8. Rólan var seld í Kids Coolshop. Viðskiptavinum er bent á að hætta notkun rólunnar strax, skila rólunni í Kids Coolshop og fá fulla endurgreiðslu.

Vakin er athygli á innköllun á barnaæfingarsetti frá EZPZ ( e.Oral Development Tool). Leikfangið var selt með 3 leikföngum í setti, 2 af leikföngunum geta valdið köfnunarhættu fyrir ung börn. HMS hvetur eigendur til að hætta notkun leikfangsins þegar í stað. Leikfangið var selt í 3 mismunandi litum. Leikfangið var selt á eftirfarandi stöðum: Babina.is, Móðurást, Hagkaup Garðabæ og Smáralind, Módel gjafahús á Akranesi, Litli Spjallarinn á Sauðárkróki, Aha.is og Barnidokkar.is. Eigendur þurfa að hafa samband við þann söluaðila sem varan var keypt hjá varðandi skil á vörunni og endurgreiðslu.

HMS hefur borist tilkynning frá Toyota um innköllun á Toyota Proace City árgerð 2022-2023. Hugbúnaðargalli getur leitt til þess að lesið séu rangar upplýsingar um spennu og hitastig rafhlöðunnar. Varnarkerfi bílsins bregst við með að slíta afli til mótorsins sem verður til þess að bíllinn stoppar. Eru eigendur beðnir um að hafa samband við Toyota til að panta tíma svo hægt sé að uppfæra hugbúnað.

HMS vekur athygli á innköllun á örbylgjuþolnum leirofni frá Søstrene Grene. Ástæða innköllunar er sú að hætta er á raflosti við meðhöndlun leirofnsins í örbylgjuofni. Þegar leirofninn er í örbylgjuofni getur örbylgjuofninn orðið rafleiðandi og notandi því orðið fyrir raflosti. Að auki getur skapast reyk og brunahætta við notkun leirofnsins í örbylgjuofninum. Eigendum leirofnsins er bent á að hætta notkun vörunnar þegar í stað. Hægt er skila vörunni í verslunum Søstrene Grene og fá hana endurgreidd að fullu.