BL hefur sent HMS tilkynningu um innköllun á Range Rover árgerð 2019 og Range Rover Sport árgerðum 2019-2020, sem eru Hybrid bílar. Um er að ræða rafhlöður í bílunum sem framleiddar voru 11. - 12. apríl 2019 sem kunna að vera gallaðar. Gallinn kemur fram sem minnkun á getu til að keyra á rafmagni eða of mikil hitamyndun í rafhlöðu sem getur endað í bruna. Mun BL laga þessa bilun. Aðeins eitt eintak var flutt inn af BL með rafhlöðu sem framleidd var á umræddum dögum. Eigir þú bíl sem fellur undir framangreinda lýsingu og telur mögulega að bíllinn hafi verið fluttur inn fram hjá umboði skaltu hafa samband við BL til að fullvissa þig um að þessi innköllun eigi ekki við um þig.

HMS hefur borist tilkynning frá BL um innköllun á Hyundai i10, 2021-2023. Hyundai i10 er innkallaður vegna skertra afkasta eldsneytisdælu. Getur það valdið því að bíllinn fari ekki í gang. Mun BL skipta um eldsneytisdælu og rör.

HMS hefur fengið tilkynningu frá BL um innköllun á BMW 1, 3, X1, X3 og M3 árgerð 2010-2015 og 3 seria og M3 árgerð 1998 - 2006. Um er að ræða hluta af svokallaðri Takata loftpúðainnköllun. Ef loftpúðar bílsins springa út geta þeir myndað sprengiflísar úr málmi sem skjótast inn í farþegarýmið sem getur valdið alvarlegum slysum og jafnvel dauða. Eigendur slíkra bíla skulu því hafa samband við BL og panta tíma svo BL geti skipt um loftpúða.

HMS vekur athygli á innköllun á leikföngum, Stretch Super Heros, Squard Dinos, Stretchy Slammerz, Stretch Squad XXL frá Stretcherz. Leikföngin eru mismunandi að lögun, mjúk viðkomu, teygjanleg og innihalda fylliefni sem er sandur. Varan getur verið heilsuspillandi þar sem að fylliefnið gæti verið mengað af asbesti. Vitneskja er um 5 vörunúmer á Íslandi sem þarf að innkalla. Innflutningsaðilinn, Danco, hefur hafið innköllun á þeim vörunúmerum. Innköllunin nær til eftirfarandi vörunúmera 1350085/1350093/1351053/1376624/ 1376630 Vörurnar voru seldar í ýmsum verslunum bæði á höfuðborgasvæðinu og á landsbyggðinni. Leikföngin voru meðal annars til sölu í Bónus, Húsasmiðjunni, Samkaup, Nettó, Byko, Hans og Grétu og hugsanlega á fleiri stöðum. Að minnsta kosti 800 vörur eru taldar vera í umferð á Íslandi. Eigendur varanna eru hvattir til að taka leikfangið strax úr umferð. Setja þarf leikfangið í poka, líma fyrir hann og skila vörunni til söluaðila, heildsölunnar Danco eða fara með vöruna beint í förgun. Hægt er að hafa samband við Danco í gegnum tölvupóst danco@danco.is eða í síma 575 0200 fyrir frekari upplýsingar. Þeir sem keyptu vöruna í gegnum verslun ,Hans og Grétu, geta haft samband við það fyrirtæki varðandi skila á vöru og endurgreiðslu.

HMS vill vekja athygli á innköllun á leikfanga tesetti sem selt var í Flying Tiger. Litlir hlutir á loki teketilsins geta losnað, sem og málmfestingar á kassanum. Þetta getur valdið köfnunarhættu hjá litlum börnum. Tesettið er úr málmi, vörunúmer 3058431 og öll lotunúmer eru innkölluð. Leikfangið hefur verið selt frá því í júlí 2024, alls 184 stykki hérlendis. Eigendur eru hvattir til að taka vöruna strax úr umferð. Hægt er að skila vörunni í næstu Flying Tiger Copenhagen verslun og fá vöruna að fullu endurgreidda.

HMS vekur athygli á innköllun á hættulegu leikfangi, barnahristu, sem getur valdið köfnunarhættu. Leikfangið er úr viði, getur verið í ýmsum litum og er með handfangi sem er um 11 cm langt. Barn getur sett handfangið, sem er langt, upp í munninn á sér sem getur valdið köfnun. Leikfangið var selt í gegnum netverslunina Wish og talið er að það sé í umferð hérlendis. Varan stóðst ekki prófun samkvæmt evrópska staðlinum EN 71-1 og er ekki í samræmi við kröfur leikfangatilskipunarinnar (Toy Safety Directive 2009/48/EC). Eigendur leikfangsins eru hvattir til að hætta notkun leikfangsins strax og setja það í förgun.

HMS hefur borist tilkynning frá Fjallakofanum um innköllun á ákveðnum Petzl ísöxum vegna hættu á að handfangið brotnar. Samkvæmt tilkynningunni frá Petzl hafa komið upp nokkur tilfelli þar sem þessar ísaxar brotnuðu í handfanginu, sem getur skapað verulega hættu á alvarlegum meiðslum eða dauðaslysi.  Í tilkynningunni kemur fram að tilteknar framleiðslulotur uppfylla ekki kröfur um endingu, sérstaklega við krefjandi notkun í ísklifri og þurrverkfæraklifri/bísklifri („e.dry tooling“). Bilunin getur komið án fyrirvara og án sýnilegra merkja. Af þessum ástæðum biður Petzl alla notendur um að hætta strax að nota ísaxir sem kunna að falla undir innköllunina. Ísaxir sem um er að ræða: NOMIC (U021AA00) framleiddar frá desember 2017 til júní 2020. ERGONOMIC (U022AA00) framleiddar frá júní 2018 til desember 2021.  Vinsamlegast fylgið leiðbeiningum á heimasíðu Petzl til að athuga hvort ykkar ísöxi sé innan þeirra raða sem innköllunin nær til og, ef svo er, til að fá nýtt skaft í staðinn. Fjallakofinn hvetur eigendur ísaxa sem falla undir innköllunina til að bregðast skjótt við og fara í gegnum ferlið beint hjá framleiðanda. Petzl er til taks fyrir allar frekari spurningar.

HMS hefur borist tilkynning frá Heklu um innköllun á Skoda Kodiaq, árgerð 2025, og VW Amarok, árgerð 2025. Skoda Kodiaq er innkallaður vegna hættu á að hvöss brún í sætisgrind geti skemmt hliðarloftpúða ef hann springur út við árekstur. Því er vörn farþega minni en ætla mætti í árekstri. Mun Hekla setja hlíf á brúnir sætisgrindar svo loftpúðinn geti blásið eðlilega út gerist þess þörf. VW Amarok er innkallaður þar sem rafstýrð hemlunaraðstoð gæti hætt að virka. Ef bilun verður kemur viðvörun í mælaborð, bremsupetali verður þungur og erfitt verður að mynda nægilegan kraft til að hemla. Þetta veldur lengri hemlunarvegalengd og eykur slysahættu. Hekla mun uppfæra hugbúnað sem leysir vandamálið.

HMS hefur borist tilkynning frá Öskju varðandi innköllun á tveimur tegundum af Honda felgum sem seldar voru sem felguuppfærsla með nýjum Honda Civic bílum frá árinu 2017 - 2021. Ástæðan fyrir innkölluninni er sú að mögulega voru felgurnar framleiddar án stálpressuhólka og því sé hætta á minna herslutogi felguróa. Það þýðir að hætta sé á að hjól fari undan bíl á ferð með tilheyrandi slysahættu. Mun Askja skipta út felgum, felguboltum, felguróm eins og við á í hvert skipti og hjólastilla bílinn. Þeir sem eiga Honda Civic frá árinu 2017-2021 eru beðnir að senda tölvupóst á askja@askja.is með mynd af felgunum ásamt bílnúmeri. Samkvæmt Öskju fylgdu þessar felgur ekki ökutækjum sem hafa verið keypt af Öskju heldur eingöngu Bernhard, sem var með Honda umboðið áður.

Húsnæðis- og mannvirkjastofnun vekur athygli á innköllun á tilteknum skíðaskóm frá HEAD. Everest flytur inn skó frá HEAD en þær framleiðslulotur sem um ræðir í þessari innköllun voru ekki til sölu hjá fyrirtækinu. Hins vegar tók Everest fjögur pör af skíðaskóm úr umferð í skíðaleigu sinni í kjölfar innköllunarinnar. Um er að ræða skíðaskó í öllum stærðum sem framleiddir voru á árunum 2016–2022. Innköllunin nær til framleiðslulota númer 601113, 601150, 602113, 602124, 602127, 606616, 607056, 607311, 607335, 607337, 608033, 608113 og 609060. Umræddar gerðir eru ADVANT EDGE 105, ADVANT EDGE 85 R, FORMULA 120, FORMULA 120 GW, FORMULA RS 120, FORMULA RS 120 GW, NEXT EDGE 85HT, RAPTOR 40HT, RAPTOR 50HT, VECTOR 130 RS og VECTOR EVO ST. Ástæða innköllunarinnar er sú að rifur og sprungur geta myndast í efninu á líftíma vörunnar. Slíkar skemmdir geta leitt til þess að notandi missi stjórn á skíðum sínum, sem eykur hættu á falli og meiðslum. Varan uppfyllir ekki kröfur sem gerðar eru samkvæmt almennu vöruöryggisreglugerðinni (General Product Safety Regulation). Framleiðandi ákvað að innkalla vöruna frá neytendum. Neytendur sem eiga umrædda skíðaskó eru hvattir til að hætta notkun þeirra tafarlaust og kynna sér nánari upplýsingar og leiðbeiningar á vef framleiðanda: https://www.head.com/de_AT/recalls

Umhverfis- og orkustofnun vekur athygli á því að Garðheimar gróðurvörur ehf. hafa innkallað Húsa- og garðaúða í 400 ml málmúðabrúsum. Framleiðslunúmerið er: P31396. Ástæða innköllunarinnar er að botninn á umbúðum vörunnar er ekki þéttur og getur vökvinn lekið út. Varan er hættuleg umhverfinu og skaðleg lífi í vatni. Umbúðir sem leka auka áhættuna á að innihaldið berist í niðurföll og þaðan út í umhverfið. Garðheimar gróðurvörur ehf. beina því til neytenda sem keypt hafa vöruna að skila henni á næsta sölustað eða til Garðheima, Álfabakka 6, 109 Reykjavík og fá endurgreitt.

Húsnæðis- og mannvirkjastofnun (HMS) vekur athygli á innköllun frá IKEA á ákveðnum tegundum af NYMÅNE veggljósum. Vegna framleiðslugalla eru rafmagnsvírar ekki nægilega vel einangraðir, sem getur skapað hættu á rafstuði. Hægt er að sjá hvort varan falli undir innköllunina á dagstimpli og framleiðandanúmeri ljósanna. Vörur sem umræðir eru: -  NYMÅNE veggljós/lesljós, hvítt. Vörunúmer: 203.569.09 -  NYMÅNE veggljós/lesljós, kolgrátt. Vörunúmer: 504.152.24 Eftirtaldir dagstimplar (ÁÁVV) falla undir innköllunina: Frá 2217 til 2550 (frá viku 17, 2022 til viku 50, 2025) frá framleiðanda númer 23241. Hægt er að finna dagstimpil og framleiðandanúmer á límmiða inni í lampaskerminum en athugið að taka þarf ljósaperuna úr til að sjá númerin .Viðskiptavinir skulu alltaf taka vegglampann úr sambandi áður er þeir handleika hann. Eigendur ljósana eru hvattir til að taka þau strax úr umferð og hafa samband við IKEA til að fá nýja vöru eða endurgreiðslu. Nánari upplýsingar eru veittar í þjónustuveri í síma 520 2500 og á IKEA.is. Athugið að vörur með dagstimpla fyrir 2217 og eftir 2550 eða með öðru framleiðandanúmeri falla ekki undir innköllunina.