Húsnæðis- og mannvirkjastofnun (HMS) varar við notkun festinga í bergi (e. anchor) af gerðinni Petzl Longlife Type 1, sem ætluð eru til varanlegrar uppsetningar á klifursvæðum. Komið hefur í ljós að burðarþol festinganna er ófullnægjandi og uppfylla þær ekki kröfur sem gerðar eru til fallvarna. Notkun festinganna getur leitt til þess að þær þoli ekki fall, sem getur haft í för með sér alvarleg meiðsl eða lífshættuleg slys. Festingarnar voru settar á markað á árunum 1988–1991 og eru framleiddar í Frakklandi. HMS hvetur eigendur og umsjónaraðila klifursvæða til að kanna hvort slíkar festingar séu enn í notkun og fjarlægja þær tafarlaust ef þær finnast. Klifrarar eru jafnframt hvattir til að sýna aðgát og forðast notkun eldri eða óþekktra festinga þar sem burðarþol og uppruni eru óviss. Sjá nánari tilkynningu frá Safety Gate og einnig upplýsingar á vefsíðu framleiðanda.

Húsnæðis- og mannvirkjastofnun (HMS) barst tilkynning í gegnum evrópska eftirlitskerfið Safety Gate um að tilteknar lotur frá CURAPROX snuðum innihaldi of háan styrk af bisfenóli A (BPA) sem getur haft áhrif á hormónastarfsemi. Innköllunin á aðeins við um lotur 006, 007, 008, 009, 010, 011 sem eru merktar á snuðunum. Icepharma tók snuðin úr sölu í nóvember 2024 og því nær innköllunin aðeins til neytenda. Snuðin voru seld í mismunandi litum bláum, bleikum, kóral og turkisbláum. Snuðin hafa fengist m.a. í apótekum hérlendis en innflutningsaðili vörunnar er Icepharma. Varan var prófuð með tilliti til gildandi lagaákvæða og evrópskra staðla og reyndist ekki uppfylla kröfur laga nr. 134/1995  um öryggi vöru og opinbera markaðsgæslu og út frá REACH reglugerðinni (EB nr. 1907/2006). Í ljósi þessarar niðurstöðu er talið nauðsynlegt að innkalla vöruna tafarlaust og tryggja að hún sé ekki lengur til sölu eða í notkun. Öryggi og velferð barna er í algjörum forgangi og eru neytendur hvattir til að hætta notkun vörunnar strax. Framleiðandinn hefur gefið út frekari upplýsingar varðandi innköllunina.

Húsnæðis- og mannvirkjastofnun (HMS) vill vara forráðamenn barna við mögulegri hættu sem fylgt getur notkun á snudduböndum sem innihalda viðarklemmur eða aðra viðaríhluti. Stofnuninni hefur borist nokkrar tilkynningar um að slíkar viðarklemmur hafi brotnað við notkun. Í þeim málum sem komið hafa til skoðunar virðist viðurinn hafa morknað eða brotnað.   Viður er náttúrulegt efni sem bólgnar, mýkist og veikist þegar hann blotnar eða verður fyrir endurteknum raka, til dæmis frá slefi. Þegar þetta gerist geta:  trefjarnar mýkst efnið veikst yfirborðið morknað  sprungið eða brotnað  Ef viður er ekki sérstaklega húðaður, lakkaður eða meðhöndlaður fyrir raka  verður hann mun viðkvæmari fyrir sliti og morknun. Brot úr viðarklemmum geta valdið köfnunarhættu fyrir ung börn ef þau losna af snuddubandinu.  HMS hvetur foreldra og forráðamenn eindregið til að:  Yfirfara snuddubönd með viðarhnöppum eða viðarklemmum reglulega og athuga hvort merki séu um sprungur, molnun eða aðrar skemmdir Hætta undir eins notkun ef merki um minnstu skemmdir finnast eða ef óvissa vaknar er um öryggi vörunnar  Tilkynna til HMS ef grunur vaknar um óörugga vöru eða ef snudduband brotnar  Öryggi barna er í fyrirrúmi og vill HMS minna á mikilvægi þess að fylgjast reglulega með ástandi allra snuddubanda og smábarnaáhalda til að tryggja örugga notkun. 

Húsnæðis- og mannvirkjastofnun (HMS) varar neytendur við tveimur gerðum snuddubanda frá verslunarkeðjunni Primark. Snudduböndin hafa verið innkölluð vegna alvarlegra öryggisgalla. Snudduböndin voru seld tvö í pakka og eru með mismunandi mynstri eins og böngsum, loftbelgum eða lömbum. Við skoðun kom í ljós að snudduböndin uppfylla ekki lágmarkskröfur um öryggi. Band snuddubandanna er of langt og getur því vafist um háls barns, sem getur valdið kykingarhættu. Jafnframt er klemman á snudduböndunum án nauðsynlegra loftræstingargata sem eiga að tryggja öryggi ef hlutar vörunnar lenda í munni barns. Skortur á slíkum götum eykur hættu á köfnun. HMS hvetur alla sem kunna að eiga umrædd snuddubönd til að hætta notkun þeirra þegar í stað og skila þeim til seljanda.

HMS hefur borist ábending í gegnum Safety Gate tilkynningakerfi um hættulegar vörur sem þarf að innkalla. Um er að ræða via ferrata klifursett frá Mammut með strikamerkjum: 7619876216519, 7619876216526, 7619876450883 og 7619876450890. Heiti varanna er Skywalker Pro Turn Via Ferrata Set, Skywalker Pro Via Ferrata Package og Skywalker Pro Via Ferrata Set Um er að ræða sett með lotunúmerunum framleitt 07/2021 og 11/2022. Aðrar lotur, þar á meðal 07/2021 og 11/2022 með viðbótinni „R“ þarfnast frekari skoðunar. Ástæðan fyrir innkölluninni er að mikil hætta er á falli. Prófanir á búnaðinum sýna að styrkur vörunnar er ófullnægjandi, þar sem hlið karabínunar getur opnast við kraft sem er undir 1 kN (um 100 kg). Ef hliðið opnast getur klifrarinn losnað af öryggislínunni og fallið úr hæð, sem getur valdið alvarlegum eða lífshættulegum meiðslum. Ef hlið karabínunar opnast við minni kraft en samsvarar 100 kg álagi stenst hún ekki það álag sem venjulegur klifurbúnaður á að þola. Í klifri geta álagstopparnir orðið margfalt hærri, jafnvel við lítið fall, sem gerir þetta að alvarlegu öryggisfráviki. Varan uppfyllir ekki reglugerð um persónuhlífar, sem gildir í Evrópusambandinu og EES varðandi búnað sem ætlaður er til að verja fólk gegn líkamstjóni. HMS vil beina því til neytenda að hætta strax notkun á via ferrata klifursettum, kanna lotunúmer karabínanna (07/2021 og 11/2022) og hafa samband við seljanda eða innflytjanda til að fá upplýsingar um endurskoðun, skiptivöru eða endurgreiðslu. Varðandi önnur lotunúmer sem eru með viðbótinni R þá er gott að geyma búnaðinn þar til frekari fyrirmæli liggja fyrir frá framleiðanda.

Ísband hefur vakið athygli HMS á fyrirhugaðri innköllun á hybrid bifreiðum frá Jeep. Um er að ræða Jeep Wrangler árgerðir 2020-2025 og Jeep Grand Cherokee 2022-2026. Í einhverjum tilfellum geta rafhlöður ökutækjanna verið gallaðar og kviknað í þeim. Ísband mun hringja í eigendur bifreiða sem á að innkalla. HMS vill biðja þá sem eiga slíka bíla sem voru ekki fluttir inn af Ísband að hafa samband við umboðið til að athuga hvort slík innköllun hvíli á þeirra bíl.

HMS fór í úttekt á leikföngum sem keyptar voru af netsölutorgi. Meðfylgjandi eru myndir af leikföngum sem uppfylla ekki leikfangastaðal og því talin hættuleg fyrir börn. HMS varar við þessum leikföngum og hvetur fólk til að taka þau úr umferð. Nánar um niðurstöðu úttektar á vörum frá netsölutorgum.

HMS vekur athygli á hættulegu fiktleikfangi sem lítur út eins og gírafi. Leikfangið er með útdraganlegum fótum og sogskálum á endum fótanna. Leikfangið uppfyllir ekki leikfangastaðla og geta sogskálar leikfangsins losnað og valdið köfnum hjá börnum. Leikfangið er sett á markað með röngum aldursmerkingum. Á umbúðum vörunnar kemur fram að leikfangið er ætlað 14+ sem er rangt því þessi vara flokkast sem leikfang. Rangar aldursmerkingar geta valdið ruglingi meðal neytenda. Búið er að setja sölubann á leikfangið á netsölutorgum en talið er að leikfangið geti verið í umferð á Íslandi. HMS hvetur eigandur til að taka leikfangið úr umferð til að tryggja öryggi barna.

Markwins Beauty Brands INTL Ltd hefur innkallað fljótandi augnblýant af gerðinni, Wet n Wild Proline Tip Eyliner (E8752). Við innra gæða eftirlit fyrirtækisins kom í ljós að augnblýanturinn inniheldur of hátt magn af litarefninu Carbon Black ( CI 77266, nano). Varan ekki í samræmi við gildandi öryggisreglur um snyrtivörur innan Evrópu og því þarf að innkalla vöruna. HMS hvetur eigendur til að hætta notkun augnblýantsins strax. Augnblýanturinn hefur verið til sölu hérlendis á Beautybox.is, í Hagkaup og hugsanlega á fleiri stöðum. Hægt er að skila vörunni á þann sölustað þar sem hún var keypt.

Húsnæðis- og mannvirkjastofnun (HMS) hefur borist tilkynning frá Olís um innköllun á endurskinsmerkjum sem merkt eru Olís með grænum stöfum á annarri hliðinni og Ób á hinni. Ástæða innköllunarinnar er sú að endurskinsmerkið uppfyllir ekki þær öryggiskröfur sem gerðar eru til endurskinsmerkja. Það er meðal annars ekki CE merkt, engar upplýsingar eru um staðal, framleiðanda eða notkunarleiðbeiningar. Olís biður alla sem eiga slíkt endurskinsmerki að hætta notkun þess strax og skipta því út fyrir CE merkt endurskinsmerki. Þetta merki veitir því falskt öryggi sem er hættulegra en að hafa ekkert merki. Notum CE merkt endurskinsmerki og sjáumst í myrkrinu!

Labubu tuskudýr hafa orðið mjög vinsæl að undanförnu. Í kjölfarið hefur myndast markaður fyrir eftirlíkingar sem kallast Lafufu. Erlendir eftirlitsaðilar og tollayfirvöld í EU hafa stöðvað fjölda sendinga með eftirlíkingum af Labubu þar sem þær uppfylltu ekki öryggiskröfur sem gilda um leikföng. Því er varað sérstaklega við eftirlíkingum á Labubu tuskudýrunum. Um daginn voru um 35.000 stykki af Lafufu gerð upptæk í Portúgal og nýlega hefur sænski tollurinn lagt hald á yfir 5.300 Lafufu tuskudýr. Í prófunum hjá sænsku efnastofnuninni fundust bönnuð efni í flestum eftirlíkingunum. Efni af tegundinni þalöt, aðallega DEHP, fundust í 5 af 7 leikföngum sem prófuð voru í Svíþjóð. Þalöt eru notuð til að mýkja plast. Þalöt geta: Truflað hormónastarfsemi Haft áhrif á frjósemi við langvarandi útsetningu Losnað úr efninu með tímanum og borist t.d. í ryksöfnun á heimilum Fólk er því sérstaklega varað við að kaupa eftirlíkingar á Labubu tuskudýrum. Eigendur þeirra eru hvattir til að farga þeim á öruggan hátt. Hvernig á að kanna hvort leikfang sé öruggt Leikföng geta almennt haft öryggisgalla. Þegar þú kaupir leikfang er gott að skoða eftirfarandi: Athugaðu CE-merkingu CE-merking staðfestir að varan uppfylli öryggiskröfur. Ekki kaupa leikfang án CE-merkingar eða leikfang með röngu CE merki til dæmis China Export merkinu. Skoðaðu upplýsingar á umbúðum Á umbúðunum á að koma fram framleiðandi, leiðbeiningar og viðvaranir á tungumáli landsins þar sem varan er seld. Prófaðu leikfangið Kreistu og togaðu leikfangið til að sjá hvort smáhlutir losni. Smáhlutir geta valdið köfnunarhættu hjá ungum börnum. Lyktaðu af leikfanginu Ef það lyktar sterkt getur það gefið til kynna hættu á skaðlegum efnum. Á netinu má sjá síður þar sem hægt er að sjá muninn á alvöru Labubu tuskudýrum og eftirlíkingum, þar á meðal á þessum síðum hér, Lafufu vs. Labubu: What’s the Difference? og How to spot a fake Labubu: Pop Mart's advice for getting the real deal - ABC News. Fyrir neðan má einnig sjá frétt frá RÚV varðandi efnagreiningarnar á eftirlíkingunum af tuskudýrinu í Svíþjóð.

HMS hefur borist tilkynning frá Toyota á Íslandi að fyrirtækið bjóði nú upp á app sem gerir ökumönnum kleift að athuga hvort Toyotan þín hafi verið innkölluð vegna hættulegra Takata loftpúða. Appið og leiðbeiningar um notkun má finna á vefsíðu Toyota á Íslandi. Takata loftpúðar eru stærsta innköllunarmál bílaframleiðanda frá upphafi en bilaðir loftpúðar geta skotið frá sér málmflísum við opnun og valdið alvarlegum slysum. HMS hvetur ökumenn sem eiga bíla sem gætu verið með hættulega loftpúða að athuga sem fyrst hvort það þurfi að láta skipta um þá. Innköllunin gæti átt við um eftirfarandi bílategundir sem framleiddar voru frá 1998 til 2019. Acura, Audi, BMW, Cadillac, Citroën, Chevrolet, Chrysler, Daimler, Dodge/Ram, Ferrari, Ford, GMC, Honda, Infiniti, Jaguar, Jeep, Land Rover, Lexus, Lincoln, Mazda, McLaren, Mercedes-Benz, Mercury, Mitsubishi, Nissan, Pontiac, Saab, Saturn, Scion, Subaru og Toyota