HMS og Umhverfis- og orkustofnun vekja athygli á innköllun í Bretlandi á Squeezy Dumplings leikfangi vegna efnahættu. Um er að ræða mjúkt plastleikfang í körfulaga plastumbúðum. Varan hefur verið innkölluð í Bretlandi þar sem ytra lag leikfangsins inniheldur of mikið magn af benseni. Bensen er þekkt krabbameinsvaldandi efni og getur valdið skemmdum á erfðaefni. Því er mikilvægt að draga úr allri ónauðsynlegri útsetningu fyrir efninu, sérstaklega hjá börnum. Innöndun bensens getur jafnframt valdið ertingu í augum, nefi og hálsi. Útsetning fyrir miklu magni getur einnig valdið sviðatilfinningu í meltingarvegi og ertingu í húð. Dreifingaraðili vörunnar í Bretlandi er Samsons Cash and Carry Ltd. Á vörunni er hvorki vörunúmer né lotunúmer. Ekki er vitað hvort varan hafi verið seld hér á landi, en gera má ráð fyrir að hún geti verið í umferð hérlendis, til dæmis vegna kaupa erlendis eða í gegnum netverslanir. Neytendur sem eiga vöruna eru hvattir til að hætta notkun hennar tafarlaust. Jafnframt eru foreldrar og forráðamenn hvattir til að vera vakandi fyrir leikföngum barna sinna. Ef leikfang hefur sterka eða óvenjulega efnalykt, eða ef grunur vaknar um að það geti verið óöruggt, er ráðlagt að taka það úr umferð og láta börn ekki leika sér með það. Nánari upplýsingar má finna í tilkynningu breskra yfirvalda í tengli hér fyrir neðan.

Vakin er athygli á að AMO Toys AB innkallar leikfangið Happy Baby Pull String Activity Toy. Ástæða innköllunarinnar er að smáir hlutar geta losnað af togörmum vörunnar. Ef barn setur slíka smáhluti upp í sig getur það skapað köfnunarhættu. Neytendur sem eiga vöruna eru beðnir um að hætta notkun hennar þegar í stað og farga vörunni. Gott er að klippa togarma vörunnar til að koma í veg fyrir endurnýtingu. Varan var meðal annars seld hjá KidsCoolshop hérlendis og hugsanlega á öðrum stöðum. Hægt er að hafa samband við söluaðila varðandi skil og endurgreiðslu á vörunni.

HMS vekur athygli á innköllun á mjúkum húsgögnum frá bObles fyrir börn, þau eru framleidd úr EVA frauði. Vörurnar hafa verið seldar í nokkrum litum og útfærslum. Vörurnar geta molnað og myndað smáa hluti. Lítil börn geta sett slíka hluti upp í sig og við það skapast köfnunarhætta. Athugið að innköllunin á ekki við um allar vörur en í einhverjum tilfellum getur efnið molnað, þetta á við vörur sem framleiddar voru á tímabilinu 2021 til mars 2026. Varan hefur verið seld í vefverslun Coolshop hérlendis og einnig í erlendum vefverslunum. Neytendur sem hafa keypt umræddar vörur eru beðnir um að hætta notkun þeirra sem fyrst og hafa samband við þann söluaðila sem vörurnar voru keyptar af fyrir frekari upplýsingar. Einnig er hægt að hafa beint samband við framleiðanda varanna. Sjá tengil á innköllunarsíðu framleiðanda neðar í tilkynningunni.

Athygli er vakin á innköllun barnabílstólsins JOIE Signature i-Level sem er framleiddur 7. janúar 2022. Stólinn er merktur með gerðarnúmer I1510FCCBN000, serial númer á bilinu 0024666 til 0025148, strikamerki 5056080611112. Stólinn er fyrir börnum á bilinu 40–85 cm að hæð eða allt að 13 kg. Ástæða innköllunarinnar er að prófanir hafa sýnt að bílstóllinn dregur ekki nægilega úr hættu á meiðslum við árekstur eða skyndilega hemlun ökutækis. Þetta getur aukið hættu á meiðslum barns sem situr í stólnum. Ekki liggja fyrir upplýsingar um að þessi vara hafi verið seld hér á landi. Hins vegar er mögulegt að neytendur hafi keypt hana erlendis, pantað í gegnum vefverslanir og flutt til landsins. Neytendur sem eiga JOIE Signature i-Level barnabílstól með framangreindu gerðarnúmeri eru hvattir til að hætta notkun hans tafarlaust og hafa samband við söluaðila eða framleiðanda til að fá upplýsingar um úrræði vegna innköllunarinnar.

HMS hefur borist tilkynning frá BL um innköllun á fjórum undirtegundum á Land Rover tengitvinnbílum eða Plug in Hybrid. Innköllunin nær aðeins til sjö bifreiða sem BL flutti inn til landsins. Unnið er að því að hafa samband við eigendur viðkomandi bifreiða og bóka tíma í viðgerð. Land Rover Defender árgerðir 2021-2025- 3 bílar innkallaðir Range Rover Velar árgerðir 2021-2026 - 1 bíll innkallaður Range Rover Evoque árgerðir 2020-2026- 2 bílar innkallaðir Land Rover Discovery Sport árgerðir 2020-2025- 1 bíll innkallaður Hætta er á ofhitnun háspennurafhlöðu sem getur orðið til þess að kvikni í ökutækinu. Ástæðan er óljós en BL mun skipta um háspennurafhlöðu. Eigir þú bíl sem fellur undir framangreinda lýsingu og telur mögulega að bíllinn hafi verið fluttur inn fram hjá umboði skaltu hafa samband við BL til að fullvissa þig um að þessi innköllun eigi ekki við um þinn bíl.

HMS vekur athygli á innköllun á vatnsbrúsa fyrir börn sem getur skapað köfnunarhættu. Um er að ræða vatnsbrúsann Gourde Cinnamoroll, Hello Kitty and Friends frá vörumerkinu Primark. Innköllunin nær til allra framleiðslulota vörunnar. Strikamerkið er 991121018 og tegundarnúmer er BLUE 80117–7022701. Varan er plastglas með röri og loki í laginu eins og höfuð Cinnamoroll-persónunnar úr Hello Kitty and Friends vörulínunni. Við prófanir á vörunni kom í ljós að útstæðir hlutar í lokinu, sem líkjast eyru persónunnar, eru of langir. Ung börn geta sett þessa hluti upp í sig sem getur valdið köfnunarhættu. Varan uppfyllir ekki lög um öryggi vöru. Neytendur sem eiga vöruna eru hvattir til að hætta notkun hennar og gæta þess að hún sé ekki aðgengileg ungum börnum.

HMS vill vekja athygli á innköllun á tilteknum barnabílstólum frá Bébé Confort sem seldir hafa verið með barnakerru sem ferðakerfi (duo) eða með barnavagni og barnakerru (trio). Ástæða innköllunarinnar er að veikleiki hefur komið í ljós í tengingu milli burðarhandfangs og skeljar barnabílstólsins. Getur önnur hlið handfangsins losnað frá stólnum þegar haldið er á honum. Þetta veldur fallhættu og mögulegum meiðslum á barni. Ekki er vitað hvort að einhver eintök séu af þessari vöru á Íslandi en varan hefur verið í sölu á erlendum vefsíðum. Um er að ræða eftirfarandi vörur: BBC Breeze Trio Mineral Grey – Ref. 1982085210 BBC Brume Trio Mineral Graphite – Ref. 1982153210 BBC Sunlite Duo Mineral Graphite – Ref. 1146153210 BBC Sunlite Duo Tinted Gray – Ref. 1146077210 Strikamerki: 3220660011384, 3220660011391, 3220660344833 og 3220660344840. Innköllunin nær til allra framleiðslulota vörunnar. Neytendur sem eiga umræddan barnabílstól eru hvattir til að hætta notkun hans tafarlaust og hafa samband við söluaðila eða framleiðanda til að fá nánari upplýsingar um úrræði.

Askja sendi HMS tilkynningu um innköllun á Honda CL250, CL500 23, CL500 25YM og CMX500 mótorhjólum árgerð 2023-2025. Ástæðan er að skrúfa sem festir handfangslás við efra brúarstykki er ekki nægilega hert. Skrúfan getur losnað við akstur, festst í stýrisbúnaði og valdið því að stýrið læsist. Við það getur ökumaður fallið og orðið fyrir alvarlegu slysi. Askja mun herða skrúfuna með sérstöku verkfæri sem tryggir rétta og örugga festingu. Eigendur slíkra hjóla eru beðnir um að hafa samband við Öskju til að fullvissa sig um að innköllun hvíli ekki á þeirra hjóli.

Leikfangahljóðfæri frá Wodi eru innkölluð vegna hættu á að þau geti festst í hálsi barns og valdið lokun öndunarvegar. Leikföngin eru viðarhljóðfæri sem seld eru sex saman í setti. Fjórir hlutir í settinu stóðust ekki prófanir samkvæmt leikfangastaðlinum þar af leiðandi eru vörurnar innkallaðar. Engin slys hafa verið tilkynnt, en varan er metin geta valdið alvarlegri hættu fyrir ung börn. Því er mikilvægt að taka leikföngin úr umferð sem fyrst. Talið er að leikfangið sé í umferð á Íslandi og eru eigendur þess beðnir um að hætta notkun þess tafarlaust og farga því. Ekki er vitað hvort leikfangið hafi verið selt í verslunum hérlendis, en það var selt í gegnum netverslunina Shein.

Húsnæðis-, mannvirkja- og skipulagsstofnun (HMS) fékk tilkynningu um innköllun á undirstöðu fyrir Maxi Cosy barnabílstól (e.Maxi-Cosi FamilyFix Slide Pro base). Varan hefur verið seld í Fífu barnavöruverslun. Samkvæmt upplýsingum frá framleiðanda nær innköllunin til undirstaða (e.base) með vörunúmerið 8065057110 sem framleiddar voru á tímabilinu 6. september 2025 til 24. mars 2026. Komið hefur í ljós að vísir sem sýnir hvort barnabílstóll sé rétt festur á undirstöðuna getur sýnt grænt ljós þótt stóllinn sé ekki að fullu festur. Notandi getur því talið að stóllinn sé rétt tengdur þegar svo er ekki. Við slíkar aðstæður er hætta á að stóllinn hreyfist eða losni, sem getur valdið meiðslum. Í tilkynningunni kemur fram að ekki eigi að halda áfram að nota vöruna fyrr en farið hefur verið eftir leiðbeiningum framleiðandans. Nánari upplýsingar má nálgast hjá Fífu barnavöruverslun.  Nýjar undirstöður (e.base) eru á leiðinni til landsins og mun verslunin sjá um að skipta út vörunum um leið og þær berast. Samkvæmt upplýsingum frá Fífu hefur ekki enn náðst í sjö eigendur á FamilyFix Slide Pro base vörunni.  HMS hvetur því þá sem eiga slíka undirstöðu (e.base) til að athuga hvort hún sé meðal þeirra vara sem innköllunin nær til. Þótt innköllun barnabílstóls eða fylgihluta þeirra geti valdið áhyggjum er mikilvægt að hafa í huga að innköllunarferli eru hluti af öryggiskerfi sem ætlað er að vernda neytendur og auka öryggi barna í umferðinni.

HMS hefur borist tilkynning um innköllun á Joolz Aer2 bílstólafestingum vegna öryggisvanda sem getur komið upp við notkun. Samkvæmt tilkynningu frá framleiðanda Joolz geta festingarnar ekki alltaf læst sig rétt við Joolz Aer2 kerruna. Í ákveðnum tilfellum getur það valdið því að festingarnar losni við notkun, með þeim afleiðingum að bílstóll geti hallast fram eða fallið til jarðar. Alls hafa verið 28 atvik tilkynnt og þar af tilkynnt um slys/áverka í tveimur tilfellum. Það áréttast að hvorugt slysið átti sér stað á Íslandi. Varan sem innköllunin nær til ·       Vara: Joolz Aer2 bílstólafestingar ·       Vörunúmer: 320400 ·       Raðnúmer: NL311 ·       EAN: 8715688096512 ·       Sölutímabil: júní 2025 – maí 2026 Tekið er fram í tilkynningunni að innköllunin snýr eingöngu að Joolz Aer2 bílstólafestingunum. Joolz Aer2 kerran sjálf er ekki hluti af innkölluninni og er áfram talin örugg í notkun án festinganna. Eigendur eru beðnir um að hætta tafarlaust notkun á Joolz Aer2 bílstólafestingunum og farga vörunni á umhverfisvænan hátt. Skrá vöruna á innköllunarsíðu Joolz: https://service.joolz.com/s/car-seat-adapter-set-recall?language=en_US Joolz gerir ráð fyrir að endurbætt útgáfa af festingunum verði fáanleg frá byrjun júlí 2026. Að sögn fyrirtækisins er öryggi barna og foreldra í algjörum forgangi og er innköllunin framkvæmd af þeim sökum. Búið er að hafa samband við flesta kaupendur, en ekki hefur náðst í eigendur fjögurra eininga. Í tilkynningunni kemur fram að þrátt fyrir að verslun Mía sem dreifði vörunni sé lokuð er verið að koma upplýsingunum á framfæri til að tryggja að allir viðeigandi aðilar fái tilkynninguna sem fyrst. Fyrirtækið biðst velvirðingar á þeim óþægindum og áhyggjum sem þetta kann að valda.

HMS vill vekja athygli á barnaleikfangi í laginu eins og bíllykill með fjarstýringu, rafhlöðum og þremur lyklum. Leikfangið hefur verið tekið af markaði þar sem það stóðst ekki öryggiskröfur. Leikfangið getur festst í hálsi barns og valdið köfnun. Leikfangið var selt í gegnum Shein og hugsanlega fleiri vefverslunum. Talið er að leikfangið sé í umferð á Íslandi og eigendur leikfangsins eru hvattir til að hætta notkun leikfangsins sem fyrst.