HMS hefur borist tilkynning frá Apótekaranum og Lyf og Heilsu um að innkalla þurfi græn sólgleraugu Classic Eyewear með auðkennið China W2C. Ástæða innköllunar er að sólgleraugun eru með linsur í  síuflokki 4 (CAT 4), sem er dekksti flokkur sólgleraugnalinsa.  Engar viðvaranir fylgdu þar sem kom fram að sólgleraugun væru ekki ætluð til að notkunar við akstur.  Eins og kemur fram í tilkynningunni þá draga linsurnar verulega úr birtu og geta gert ökumönnum erfiðara fyrir að greina gangandi vegfarendur, umferðamerki eða aðrar hættur í umferðinni. Notkun þeirra við akstur getur því aukið slysahættu.   Í tilkynningunni kemur fram að viðskiptavinir sem keypt hafa þessi sólgleraugu eru beðnir um að skila þeim í næstu verslun Apótekarans eða Lyf og Heilsu og fá vöruna endurgreidda.

Ísband hefur sent HMS tilkynningu um innköllun á Jeep tengiltvinnbílum vegna eldhættu í háspennurafhlöðu. Innköllunin nær til eftirfarandi ökutækja: Jeep Wrangler 4xe, árgerðir 2020–2025 Jeep Grand Cherokee 4xe, árgerðir 2022–2026 Stellantis, framleiðandi ökutækjanna, hefur ákveðið að framkvæma innköllun á 433 tengiltvinnjeppum til að bregðast við mögulegri eldhættu, þar af eru að minnsta kosti 91 bifreið hérlendis á innköllun. Stellantis, vinnur að lausn málsins. Eigendur verða upplýstir þegar hægt verður að bóka ökutækin í viðgerð. Eigendum er ráðlagt að hlaða bílana ekki fyrr en viðgerð hefur farið fram og notast meira við bensín til aksturs en eldhætta minnkar eftir því sem hleðslustaða rafhlöðunnar lækkar. Jafnframt er þeim ráðlagt að leggja ökutækjunum utandyra og fjarri byggingum. Eigendur eru hvattir til að fylgja leiðbeiningum framleiðanda þegar þær berast. Eigendur ökutækja sem flutt hafa verið inn til landsins utan umboðs eru hvattir til að hafa samband við Ísband til að kanna hvort innköllunin nái til ökutækja þeirra og fá upplýsingar um næstu skref. HMS hvetur eigendur slíkra bíla að hafa samband við Ísband til að sjá hvort innköllunin nái til þeirra.

HMS vekur athygli á varasömu veiðileikfangasetti. Leikfangasettið samanstendur af háfi, veiðistöng og 3 fiskum. Fiskarnir í settinu geta valdið köfnun hjá ungum börnum. Leikfangið er frá QICHEN og vörunúmerið er Q03Y Leikfangið var selt í gegnum vefsíðuna eBay og talið er að leikfangið sé í umferð á Íslandi. Eigendur leikfangsins eru hvattir til að taka leikfangið úr umferð og farga því.

HMS vekur athygli á tveimur leikföngum sem seld voru á netversluninni SHEIN. Um er að ræða tréleikfang og nagleikfangasett fyrir börn. Bæði leikföngin geta skapað köfnunarhættu fyrir ung börn og uppfylla ekki kröfur leikfangareglugerðar. Annað leikfangið er tréhringla sem lítur út eins og kóalabjörn, New Wooden Hand Rattle með lotunúmer PMZ117001-1P. Hitt leikfangið er nagleikfangasett með 3 nagstöngum með lotunúmer 20250805-OA . Nagstangirnar voru seldar í mismunandi litum. Talið er að leikföngin séu í umferð á Íslandi og neytendur sem kunna að eiga þessar vörur ættu að hætta notkun þeirra strax og farga þeim.

HMS vekur athygli á innköllun frá Olís á fjórum tegundum af sólgleraugum sem seld hafa verið á bensínstöðvum félagsins. Kemur fram að ástæða innköllunarinnar sé sú að gleraugun eru ekki CE-merkt og það vanti jafnframt lögboðnar upplýsingar, meðal annars um síuflokk. Vegna skorts á þessum upplýsingum er ekki unnt að staðfesta hvort gleraugun uppfylli öryggiskröfur. Ekki er hægt að útiloka að um sé að ræða sólgleraugu í síuflokki 4. Slík gleraugu hleypa mjög litlu ljósi í gegnum linsurnar og eru ekki ætluð til notkunar við akstur bifreiða þar sem þau geta dregið verulega úr skyggni og aukið slysahættu. Í tilkynningunni kemur fram að viðskiptavinir sem hafa keypt einhver þessara sólgleraugna eru beðnir um að hætta notkun þeirra tafarlaust og skila þeim á næstu Olís eða ÓB stöð. Við skil verður kaupverð endurgreitt að fullu eða hægt er að velja önnur sólgleraugu. Olís biðst velvirðingar á þeim óþægindum sem þessi innköllun kann að valda og leggur áherslu á að öryggi viðskiptavina sé ávallt í fyrirrúmi.

HMS vill vekja athygli á innköllun á sandlímmiðum frá Galt. Heiti vörunnar er Galt Sand Stickers Craft Kit. Um er að ræða föndursett með 6 dýralímmiðum og 4 pokum af lituðum sandi. Varan getur verið heilsuspillandi þar sem að sandurinn gæti verið mengaður af asbesti. Asbest er bannað efni og getur valdið heilsutjóni. Varan var seld í A4 hérlendis. Alls hafa 90 eintök hafa verið seld frá árinu 2023 til apríl 2026. Neytendur sem eiga vöruna eru beðnir um að taka vöruna strax úr umferð, farga vörunni eða skila til söluaðila. Ef sandurinn er enn í umbúðunum skal setja hann í plastpoka, loka vel með límbandi og farga vörunni með öruggum hætti. Þrífa skal svæði þar sem sandurinn hefur verið notaður með blautum klút til að forðast rykmyndun. Nota skal hanska og grímu við þrif. Neytendur geta haft samband við A4 vegna skila eða nánari upplýsinga.

HMS og Umhverfis- og orkustofnun vekja athygli á innköllun í Bretlandi á Squeezy Dumplings leikfangi vegna efnahættu. Um er að ræða mjúkt plastleikfang í körfulaga plastumbúðum. Varan hefur verið innkölluð í Bretlandi þar sem ytra lag leikfangsins inniheldur of mikið magn af benseni. Bensen er þekkt krabbameinsvaldandi efni og getur valdið skemmdum á erfðaefni. Því er mikilvægt að draga úr allri ónauðsynlegri útsetningu fyrir efninu, sérstaklega hjá börnum. Innöndun bensens getur jafnframt valdið ertingu í augum, nefi og hálsi. Útsetning fyrir miklu magni getur einnig valdið sviðatilfinningu í meltingarvegi og ertingu í húð. Dreifingaraðili vörunnar í Bretlandi er Samsons Cash and Carry Ltd. Á vörunni er hvorki vörunúmer né lotunúmer. Ekki er vitað hvort varan hafi verið seld hér á landi, en gera má ráð fyrir að hún geti verið í umferð hérlendis, til dæmis vegna kaupa erlendis eða í gegnum netverslanir. Neytendur sem eiga vöruna eru hvattir til að hætta notkun hennar tafarlaust. Jafnframt eru foreldrar og forráðamenn hvattir til að vera vakandi fyrir leikföngum barna sinna. Ef leikfang hefur sterka eða óvenjulega efnalykt, eða ef grunur vaknar um að það geti verið óöruggt, er ráðlagt að taka það úr umferð og láta börn ekki leika sér með það. Nánari upplýsingar má finna í tilkynningu breskra yfirvalda í tengli hér fyrir neðan.

Vakin er athygli á að AMO Toys AB innkallar leikfangið Happy Baby Pull String Activity Toy. Ástæða innköllunarinnar er að smáir hlutar geta losnað af togörmum vörunnar. Ef barn setur slíka smáhluti upp í sig getur það skapað köfnunarhættu. Neytendur sem eiga vöruna eru beðnir um að hætta notkun hennar þegar í stað og farga vörunni. Gott er að klippa togarma vörunnar til að koma í veg fyrir endurnýtingu. Varan var meðal annars seld hjá KidsCoolshop hérlendis og hugsanlega á öðrum stöðum. Hægt er að hafa samband við söluaðila varðandi skil og endurgreiðslu á vörunni.

HMS vekur athygli á innköllun á mjúkum húsgögnum frá bObles fyrir börn, þau eru framleidd úr EVA frauði. Vörurnar hafa verið seldar í nokkrum litum og útfærslum. Vörurnar geta molnað og myndað smáa hluti. Lítil börn geta sett slíka hluti upp í sig og við það skapast köfnunarhætta. Athugið að innköllunin á ekki við um allar vörur en í einhverjum tilfellum getur efnið molnað, þetta á við vörur sem framleiddar voru á tímabilinu 2021 til mars 2026. Varan hefur verið seld í vefverslun Coolshop hérlendis og einnig í erlendum vefverslunum. Neytendur sem hafa keypt umræddar vörur eru beðnir um að hætta notkun þeirra sem fyrst og hafa samband við þann söluaðila sem vörurnar voru keyptar af fyrir frekari upplýsingar. Einnig er hægt að hafa beint samband við framleiðanda varanna. Sjá tengil á innköllunarsíðu framleiðanda neðar í tilkynningunni.

Athygli er vakin á innköllun barnabílstólsins JOIE Signature i-Level sem er framleiddur 7. janúar 2022. Stólinn er merktur með gerðarnúmer I1510FCCBN000, serial númer á bilinu 0024666 til 0025148, strikamerki 5056080611112. Stólinn er fyrir börnum á bilinu 40–85 cm að hæð eða allt að 13 kg. Ástæða innköllunarinnar er að prófanir hafa sýnt að bílstóllinn dregur ekki nægilega úr hættu á meiðslum við árekstur eða skyndilega hemlun ökutækis. Þetta getur aukið hættu á meiðslum barns sem situr í stólnum. Ekki liggja fyrir upplýsingar um að þessi vara hafi verið seld hér á landi. Hins vegar er mögulegt að neytendur hafi keypt hana erlendis, pantað í gegnum vefverslanir og flutt til landsins. Neytendur sem eiga JOIE Signature i-Level barnabílstól með framangreindu gerðarnúmeri eru hvattir til að hætta notkun hans tafarlaust og hafa samband við söluaðila eða framleiðanda til að fá upplýsingar um úrræði vegna innköllunarinnar.

HMS hefur borist tilkynning frá BL um innköllun á fjórum undirtegundum á Land Rover tengitvinnbílum eða Plug in Hybrid. Innköllunin nær aðeins til sjö bifreiða sem BL flutti inn til landsins. Unnið er að því að hafa samband við eigendur viðkomandi bifreiða og bóka tíma í viðgerð. Land Rover Defender árgerðir 2021-2025- 3 bílar innkallaðir Range Rover Velar árgerðir 2021-2026 - 1 bíll innkallaður Range Rover Evoque árgerðir 2020-2026- 2 bílar innkallaðir Land Rover Discovery Sport árgerðir 2020-2025- 1 bíll innkallaður Hætta er á ofhitnun háspennurafhlöðu sem getur orðið til þess að kvikni í ökutækinu. Ástæðan er óljós en BL mun skipta um háspennurafhlöðu. Eigir þú bíl sem fellur undir framangreinda lýsingu og telur mögulega að bíllinn hafi verið fluttur inn fram hjá umboði skaltu hafa samband við BL til að fullvissa þig um að þessi innköllun eigi ekki við um þinn bíl.

HMS vekur athygli á innköllun á vatnsbrúsa fyrir börn sem getur skapað köfnunarhættu. Um er að ræða vatnsbrúsann Gourde Cinnamoroll, Hello Kitty and Friends frá vörumerkinu Primark. Innköllunin nær til allra framleiðslulota vörunnar. Strikamerkið er 991121018 og tegundarnúmer er BLUE 80117–7022701. Varan er plastglas með röri og loki í laginu eins og höfuð Cinnamoroll-persónunnar úr Hello Kitty and Friends vörulínunni. Við prófanir á vörunni kom í ljós að útstæðir hlutar í lokinu, sem líkjast eyru persónunnar, eru of langir. Ung börn geta sett þessa hluti upp í sig sem getur valdið köfnunarhættu. Varan uppfyllir ekki lög um öryggi vöru. Neytendur sem eiga vöruna eru hvattir til að hætta notkun hennar og gæta þess að hún sé ekki aðgengileg ungum börnum.