Fyrr í ár sendi HMS tvær tegundir af Roarlabs rafrettum í prófun til að meta öryggi þeirra. Í ljós kom að rafretturnar geta verið hættulegar börnum. Við fallpróf opnuðust rafretturnar sem gerir það að verkum að börn eiga greiða leið að nikótínvökva. Nikótín fer greiðlega í gegn um húð auk þess sem aðlaðandi lykt og bragð af nikótínvökva eykur líkurnar á því að börn drekki vökvann. Áhrif nikótíns á börn eru vel þekkt og geta afleiðingar nikótíneitrunar verið mjög alvarlegar. Dufland ehf. flutti þessar rafrettur inn og brugðust skjótt við athugasemdum HMS. Vörurnar voru fjarlægðar af markaði og í kjölfarið var þeim eytt. Rafrettur eiga að þola föll úr eins meters hæð sama hvort rafrettan lendi upp á rönd, flöt eða í 45° án þess að þær leki eða opnist. Forvitnir geta því auðveldlega framkvæmt fallpróf heima hjá sér.

Við viljum vekja athygli á því að leikföng frá Miniverse, sem innihalda resín í fljótandi formi, geta verið varasöm í notkun. Fljótandi resín getur: Valdið ertingu á húð, í augum og öndunarvegi Valdið ofnæmisviðbrögðum við innöndun Verið skaðlegt ef það er innbyrt Þessi leikföng gera börnum kleift að búa til hluti sem storkna. Við vinnslu storknunar er notað fljótandi resín, sem er varasamt. Hættan liggur í meðhöndlun á fljótandi resíni. Resínið inniheldur efnin HEMA (hydroxyethylmethacrylate) og IBOA (isobornyl acrylate). Þessi efni eru ekki sérstaklega tekin fyrir í núgildandi leikfangareglugerð innan Evrópusambandsins. Framleiðandi vörunnar hefur sett fram frekari varúðarmerkingar á vöruna. Vörurnar hafa hins vegar verið innkallaðar í Bandaríkjunum og Kanada. Málið er í skoðun hjá ESB eins og er og frekari frétta af þeim niðurstöðum má vænta. Leikföngin hafa verið seld í KidsCoolshop, Hagkaupum og hugsanlega fleiri stöðum hérlendis. Við hvetjum notendur til að gæta fyllstu varúðar við notkun vörunnar.

Vakin er athygli á innköllun á spöng sem seld var í Flying Tiger Copenhagen. Spöngin er með einhyrningshorni, slöri og ljósi. Lokið á rafhlöðuboxinu er ekki nægilega vel fest og því geta börn komist auðveldlega í rafhlöður, ef börn setja rafhlöður upp í munn sér þá getur það valdið köfnunarhættu.

Vakin er athygli á varasamri púsl leikmottu með bókstöfum og tölustöfum. Púslmottan inniheldur alls 36 púsl. Leikmottan inniheldur smá hluti sem geta valdið köfnunarhættu. Varan var til sölu á vefsíðunni Wish. Grunur leikur á að leikmottan gæti verið í umferð á Íslandi.

Vakin er athygli á varasamri lyklakippu sem seld var á vefnum, sb. Wish. Lyklakippan er með áhengdan brúnan bangsa sem er með grænan skjaldbökubakpoka. Leikfangið hefur í för með sér köfnunarhættu fyrir börn. Litlir hlutir af lyklakippunni sjálfri geta losnað og valdið köfnunarhættu en einnig er blýinnihald í lyklakippunni sjálfri yfir mörkum. Saumar geta líka farið í sundur og börn komist í fyllingarefni bangsans sem getur valdið köfnunarhættu. Grunur leikur á að bangsinn gæti verið í umferð á Íslandi.

Vakin er athygli á hættulegu jólavasaljósi sem varpar jólamyndum. Vasajósið var selt í tveimur litum rauðum og grænum. Leikfangið hefur í för með sér köfnunarhættu fyrir börn eða getur skaðað meltingarveg þeirra þar sem börn geta auðveldlega opnað rafhlöðuhólfið og komist í hnapparafhlöður. Einnig er hvíti LED ljósgeislinn of sterkur og bein áhorf á geislan getur valdið sjónskaða. Vasaljósið hefur verið selt á vefnum þar með talið Shein, Alibaba, Amazon, Walmart og Temu. Grunur leikur á að leikfangið gæti verið í umferð á Íslandi.

Vakin er athygli á hættulegum Iron Man búningi sem seldur er á AliExpress. Búningurinn innheldur heilgalla, andlitsgrímu og hanska. Varan inniheldur bönd nálægt hálsi, böndin geta fest við ýmsar athafnir barns og leitt til kyrkingar. Grunur leikur á að búningurinn gæti verið í umferð á Íslandi.

Vakin er athygli á innköllun á ungbarnarólu sem seld var m.a. í vefverslun Kongens Sløjd. Mikil hætta getur fylgt notkun á rólunni þar sem hætta er á kyrkingingu ef barn fer í gegnum fótasvæði á rólunni og festir höfuðið í sætinu. Rólan er ætluð til notkunar inndyra, stærð rólunar er 30cm x 27cm x 28cm. Rólan var seld á tímabilinu frá maí 2023 til febrúar 2024. Rólan kom í 3 litum sem voru "Night Light Cherry-KS4499"/ "Night Light Dino-4500 " / "Night Light Lemon-KS4501" Grunur leikur á að rólan gæti verið í umferð á Íslandi.

Vakin er athygli á hættulegum trúðabúningi sem seldur var á vefnum m.a. á Wish. Búningurinn er með tvö áföst bönd nálægt hálsi, böndin geta fest við ýmsar athafnir barns og leitt til kyrkingar. Grunur leikur á að búningurinn gæti verið í umferð á Íslandi.

HMS verkur athygli á innköllun á skynjunarrólu sem seld var hjá Skynörvun. Mikil hætta getur fylgt notkun á svokölluðum skynjunarrólum sem eru seldar í verslunum og gætu verið í umferð á Íslandi. Vörurnar eru m.a. seldar sem hengirúm og innirólur fyrir börn. Skynjunarrólur eru oftast úr bómullartaui sem er hengt upp í loftið í gegnum hring. Hættan felst í því að barn snúist í rólunni og efnið vefjist um höfuð þess eða háls. Snúningurinn getur valdið meðvitundarleysi og jafnvel köfnun ef barnið nær ekki að losa sig. Vitað er um tilfelli þar sem skynjunarrólur hafa dregið börn til dauða.  

Vakin er athygli á hættulegri fingramálningu frá Crayola. Varan samanstendur af þremur litum, bláum, rauðum og gulum. Við efnagreiningar kom í ljós að varan inniheldur allt of mikið magn af áli sem getur valdið eitrun við inntöku. Einnig fannst of mikið magn af rotvarnarefninu formaldehýð sem getur valdið ofnæmisviðbrögðum og flokkast sem krabbameinsvaldandi efni. Grunur er um að fingramálningin sé í umferð á Íslandi.

Vakin er athygli á mögulegum galla í snjóflóðaýli frá Austuríska fyrirtækinu PIEPS GmbH. Ástæða innköllunarinnar, sem er að frumkvæði framleiðanda, er dæmi um að ekki hafi kviknað á tækinu vegna galla í tengingu þess við tiltekna tegund AAA battería, en aflgjafi tækisins eru þrjú AAA batterí. Þau tæki sem gallinn er talinn geta átt við hafa verið seld á tímabilinu 1. október 2023 til 22. nóvember 2024. Tækið hefur verið selt í stykkjatali eða fleiri saman sem snjóflóðavarnapakki. Talið er mögulegt að allt að 26 stykki af vörunni hafi verið seld til Íslands.