HMS hefur borist tilkynning um hættulegar ísaxir og klifurbelti frá framleiðandanum Petzl sem hafa verið sett á markað og eru nú til innköllunar. Ísaxirnar sem eru innkallaðar heita Piolets, hætta er á að handfangið getur brotnað við notkun á ísöxunum sem getur leitt til falls og meiðsla. Módelnúmerið er ERGONOMIC U022AA00 framleitt í júní 2018 til desember 2021 og NOMIC U021AA00 framleitt í desember 2017 til júní 2020. Hérlendis hafa 16 ísaxir verið í dreifingu. Þegar hefur verið brugðist við og hafa sex ísaxir verið innkallaðir. Vinna við að ná til þeirra eintaka sem eftir standa er áfram í gangi. Petzl innkallar einnig klifurbelti af gerðinni Canyon Guide  eftir að alvarlegur galli fannst í festibúnaði.  Gallinn getur valdið því að festing opnast við notkun, sem eykur hættu á falli og alvarlegum meiðslum. Um er að ræða módel C086BA00 og C086BA01 með lotunúmerum eldri en 23J9999999 999. Samkvæmt fyrirliggjandi upplýsingum HMS eru enn tvö klifurbelti í umferð sem mikilvægt er að finna og taka úr notkun hið fyrsta. Viðkomandi vörur hafa meðal annars verið til sölu hjá Fjallakofanum og Stoðtækjum. Neytendur sem hafa keypt umræddar vörur eru hvattir til að hætta notkun þeirra tafarlaust og hafa samband við söluaðila til að fá frekari upplýsingar. Nánari upplýsingar um innköllunina má finna á vef Safety Gate, sjá fyrir neðan https://ec.europa.eu/safety-gate-alerts/screen/webReport/alertDetail/10098401?lang=en https://ec.europa.eu/safety-gate-alerts/screen/webReport/alertDetail/10098339?lang=en HMS biðlar jafnframt til fyrirtækja sem kunna að hafa haft þessar klifurvörur til sölu að hafa samband og staðfesta hvort viðkomandi vörur hafi verið í þeirra vöruframboði. Öryggi notenda er ávallt í forgangi og er mikilvægt að bregðast hratt við til að koma í veg fyrir slys.

HMS hefur fengið tilkynning um innköllun á Ford Kuga PHEV 2019-2025. Ástæða innköllunarinnar er sú að skammhlaup getur orðið í rafhlöðu tengiltvinnbílsins sem gæti valdið aflmissi á ferð eða jafnvel að eldur kvikni í rafhlöðunni. Ford veit af þessum galla og er að leita lausna sem þeir gera ráð fyrir að verði tiltæk um mitt ár 2026. Þá mun Brimborg senda eigendum slíka bifreiða tilkynningu um innköllun. Þangað til mælir Brimborg með að hlaða alls ekki rafhlöðuna yfir 80% þar til viðgerð hefur farið fram. Ef þú átt slíkan bíl sem hefur verið fluttur inn af öðrum aðila en Brimborg getur þú athugað hvort innköllunin eigi líka við um bílinn þinn.

HMS fékk senda tilkynningu frá BL um innköllun á MG3 2025 bílum. Ástæða innköllunarinnar er sú að lendi bíllinn í árekstri getur bílstjórasætið hreyfst sem eykur líkur á slysum. BL mun koma fyrir stöðvunarkubb á sætisfestingu sem kemur í veg fyrir þessa hreyfingu. Eigendur eru beðnir um að hafa samband við BL til að panta tíma í viðgerð.

HMS barst tilkynning um innköllun frá Öskju á KIA Sorento MQ4, EV9, EV5, EV4, EV3 og PV5 2025-2026. Mælaborð ökutækis getur starfað hægar en eðlilegt getur talist vegna bilunar í rásarvörn. Gerist þetta vegna utanaðkomandi spennutruflana á meðan á akstri stendur. Fær ökumaður því ekki réttar upplýsingar um stöðu ökutækis eins og hraða þess. Askja mun uppfæra hugbúnað mælaborðsins til þess að laga þessar truflanir. Eru eigendur ökutækja beðnir um að hafa samband við Öskju og bóka tíma. Þá vill Askja benda viðskiptavinum sínum á að fyrirtækið bíður upp á innköllunargátt þar sem hægt er að fletta upp hvort innköllun hvíli á ökutækjum sem Askja hefur flutt inn. Slóðin er https://www.askja.is/oryggisinnkollun-okutaekja. Hafa ber í huga að ef ökutæki hefur verið flutt inn í einkainnflutningi er ekki víst að það komi fram á gáttinni.

IKEA innkallar tvær gerðir af SMÖJTRÄD kertum án ilms, 25 cm, 4 í pakka: Vörunúmer 606.131.05 – drappað Vörunúmer 406.131.06 – grænt Vörurnar voru seldar hérlendis frá 1. júní 2025 til 30. nóvember 2025. Vegna framleiðslugalla geta sum kertin innihaldið auka búta af kveik í kertavaxinu. Það getur valdið stærri loga en eðlilegt er og skapað eld- og brunahættu. Viðskiptavinir sem eiga umrædd kerti eiga að taka þau úr umferð sem fyrst og skila þeim í IKEA verslun til að fá nýja vöru eða endurgreiðslu. Kvittun er ekki nauðsynleg. Nánari upplýsingar eru veittar í þjónustuverinu hjá IKEA í síma 520 2500 og á IKEA.is.

HMS hefur borist tilkynning um innköllun á endurskinsvestum frá Hitopin. Vestin uppfylla ekki kröfur um endurskin og tryggja því ekki nægilegan sýnileika við aðstæður þar sem slíkt er nauðsynlegt. Af þeim sökum geta þau aukið hættu á slysum og meiðslum. Varan var seld á netinu meðal annars í gegnum Amazon (ASIN BOB68N2Z8R) í stærðinni 20x30x8cm. Varan var seld í mismunandi litum. Tilkynningin barst HMS í gegnum tilkynningakerfi Evrópu. Varan er framleidd í Kína og uppfyllir hvorki reglugerð um persónuhlífar né evrópska staðalinn EN 20471. Endurskinsvestin hafa verið fjarlægð af sölusíðum á netinu. HMS hvetur þá sem eiga slíkt vesti eða vita af einhverjum sem á það, til að hætta notkun þess og útvega sér nýtt endurskinsvesti. HMS minnir jafnframt á mikilvægi þess að nota viðurkennd endurskinsmerki til að auka öryggi í umferðinni.  Sjáumst.

HMS hefur borist tilkynning frá Toyota á Íslandi um innköllun á Toyota Highlander 2021-2023. Ástæða innköllunarinnar er að festing fyrir stillanlegt sætisbak virkar ekki sem skyldi og getur losnað. Það getur aukið líkur á meiðslum við árekstur þar sem farþegi er ekki fastur í sætinu. Mun Toyota skipta um gorm í stillanlegu sætisbaki sem mun laga gallann. Eigendur eru beðnir um að hafa samband við Toyota og panta sér tíma á verkstæði sé þess þörf.

HMS hefur fengið tilkynningu um innköllun á Jaguar Ipace 2019-2020. Jaguar Ipace er rafbíll og er innkallaður vegna mögulegrar ofhitnunnar í háspennurafhlöðu. Ofhitnunin getur orðið það mikil að rjúki úr eða jafnvel kvikni í rafhlöðunni. Þessi ökutæki hafa verið innkölluð áður en það hefur komið í ljós að þær viðgerðir hafi ekki skilað árangri. BL mun uppfæra hugbúnað bílsins og takmarka hleðslugetu bílsins við 90% sem tímabundna lausn á meðan unnið er að varanlegri lausn. Eru eigendur slíkra bíla hvattir til að hafa samband við BL og panta tíma í hugbúnaðaruppfærslu. Ekki er ráðlagt að hlaða meira en 90% af getu rafhlöðu á meðan beðið er eftir þjónustu BL.

HMS vill vara við notkun á burðarsjali (e.baby sling)  frá Caboo, gerð „Carrier“, sem er ætlað börnum frá 2,3kg. – 14,5 kg. Varan er úr bómullarprjónuðu efni og fáanleg í litunum "porpoise", "sage", "olive" og "denim". Burðasjölin hafa fengist á erlendum vefsíðum eins og Amazon. Ástæðan fyrir innkölluninni er að efnið í vörunni er mjög eldfimt og getur kviknað auðveldlega í því. Notkun nálægt hita- eða logagjafa getur valdið bruna, köfnun vegna lofttegunda sem losna við brunann. Hætta er að barn geti fallið úr burðasjalinu og slasist þar sem burðaþol og stöðugleika eiginleikar burðasjalsins geta skerst. Neytendur eru hvattir til að hætta notkun baby sling „Carrier“ frá Caboo

HMS hefur fengið tilkynningu frá Heklu um innköllun á Skoda Fabia, Octavia og Yeti 2014-2016 og Audi TT 2015 - 2017 og R8 2016-2017. Allar innkallanirnar eru hluti af svokallaðri Takata loftpúðainnköllun. Ef loftpúði virkjast við árekstur er möguleiki á að málmflísar skjótist út í farþegarýmið og skaði ökumann og mögulega farþega. Mun Hekla skoða hvort Takata loftpúðar séu í ökutækinu og ef svo er verður skipt um loftpúðann. Eru eigendur beðnir um að hafa samband við Heklu og panta tíma í viðgerðarþjónustu hjá þeim.

BL hefur sent HMS tilkynningu um innköllun á Range Rover árgerð 2019 og Range Rover Sport árgerðum 2019-2020, sem eru Hybrid bílar. Um er að ræða rafhlöður í bílunum sem framleiddar voru 11. - 12. apríl 2019 sem kunna að vera gallaðar. Gallinn kemur fram sem minnkun á getu til að keyra á rafmagni eða of mikil hitamyndun getur átt sér stað í rafhlöðu sem getur endað í bruna. Mun BL laga þessa bilun. Aðeins eitt eintak var flutt inn af BL með rafhlöðu sem framleidd var á umræddum dögum. Eigir þú bíl sem fellur undir framangreinda lýsingu og telur mögulega að bíllinn hafi verið fluttur inn fram hjá umboði skaltu hafa samband við BL til að fullvissa þig um að þessi innköllun eigi ekki við um þig.

HMS hefur fengið tilkynningu um innköllun á kertum frá IITTALA, nánari tiltekið Aalto og Kanto kertum vegna mögulegrar eldhættu. Ástæðan innköllunar er sú að þræðir kertanna geta valdið miklum reyk, óeðlilegu vaxrennsli og of háum loga. Af þeim sökum er hætta á að kviknað geti í nærliggjandi hlutum þegar kveikt er á kertunum. Um er að ræða ýmsar tegundir af kertunum. Nánari upplýsingar um vörunúmer og strikamerki má finna neðar í tilkynningunni. Ekki er vitað til þess að þessi kerti hafi verið seld á Íslandi en hægt er að kaupa þau í gegnum vefverslanir og erlendis. Eigendur kertanna eru hvattir til að hætta notkun þeirra sem fyrst.