Tilkynningar

Fræðsla

Um Vöruvaktina

Um leysibenda gilda alþjóðlegir staðlar og eru þeir flokkaðir eftir áhættunni sem fylgir notkun þeirra. Leysibendar með afl undir 1 mW ( milliWatt ) eru yfirleitt í flokkum 1 og 2 og eiga ekki að geta valdið skaða á auga við eðlilega notkun.  Leysibendar með afl meira en 1 mW eru í flokkum 3 og 4 og geta valdið skaða á auga og húð. Þess vegna er notkun þeirra háð leyfi Geislavarna ríkisins. Þess aflmeiri sem leysibendirinn er því alvarlegri getur skaðinn orðið. Geislinn frá leysibendi í flokki 4 er það aflmikill að hann getur valdið húðskaða, íkveikju og bæði bein geislun og endurkast geislans getur valdið augnskaða.

Frekari upplýsingar um leysibenda og leysa eru hér á heimasíðu Geislavarna.

Um innflutning og notkun leysibenda gildir reglugerð nr. 171/2021.

Það er mikilvægt að foreldrar og aðrir aðstandendur komi í veg fyrir að börn leiki sér með leysibenda því þeir geta valdið alvarlegum augnskaða á örstund sé geislanum beint að auga.

Á öflugum leysibendum á að vera CE-merking sem og merkingar um flokkun og hættu við notkun. Því miður eru merkingar stundum rangar og því öruggast að börn leiki sér alls ekki með leysibenda. Varað er við því að slík tæki séu keypt af götusölum erlendis.

Geislavarnir ríkisins ítreka þau mikilvægu skilaboð að leysibendar eru ekki leikföng en áður hefur verið greint frá því þegar ungur drengur hlaut alvarlegan augnskaða vegna geisla frá leysibendi.

Leysibendar eru ekki leikföng!

Sá aðili sem flytur inn bílinn losnar ekki undan ábyrgð með því að selja bílinn því staða hans sem innflytjandi breytist ekki við það. Því gæti viðkomandi þurft að borga fyrir viðgerð á bíl sem hann á ekki lengur.

Líkt og með aðrar vörur eru það framleiðendur sem bera ábyrgð á framleiðslugöllum ökutækja. Framleiðandi ber þó takmarkaða ábyrgð á ökutæki sem er flutt á milli markaðssvæða af framtaksömum einstaklingum. Því gæti framleiðandi eingöngu boðið upp á viðgerðir á því markaðssvæði sem ökutækinu var ætlað að vera á. Þá getur komið upp sú staða að innflytjandi ökutækisins þarf að koma því aftur á upprunalegt markaðssvæði þar sem framleiðandi sinnir úrbótum eða að hann þurfi að greiða viðgerðaraðila hérlendis sjálfur fyrir viðgerð vegna framleiðslugalla.

Ert þú að hugsa um að flytja inn bíl utan Evrópu til einkanota? Hafðu í huga að þú gætir þurft að borga fyrir úrbætur vegna framleiðslugalla.

Til landsins eru reglulega fluttir inn bílar og önnur ökutæki utan Evrópu og er það í sjálfu sér í góðu lagi svo lengi sem þeir uppfylla allar kröfur sem gerðar eru til ökutækja á Íslandi. Til dæmis gæti verð á bandarískum bílum þótt eftirsóknarvert auk þess sem þeir geta verið aflmeiri og þótt flottari. Beinir HMS  til þeirra sem huga að einkainnflutningi ökutækja að þeir gætu borið persónulega ábyrgð á framleiðslugöllum sem geta komið upp.

Innflutningur til einkanota á ökutækjum utan Evrópu

Matarstólar fyrir börn þurfa að uppfylla staðal EN 14988:2017 + A1:2020.

Mikilvægt er að skoða merkingar, viðvaranir og leiðbeiningar vörunnar, auk þess að tryggja að stóllinn sé stöðugur og veiti barni fullnægjandi öryggi.

Tryggðu að stóllinn sé stöðugur og að hægt sé að festa barnið á öruggan hátt.

Ekki nota gallaðan stól og tilkynntu galla til seljanda og eftirlitsstjórnvalda.

Kannaðu hvort litlir hlutir séu til staðar sem gætu lostnað og valdið köfunarhættu.

Kannaðu hvort hættuleg op séu til staðar þar sem útlimir barnsins gætu festst eða barnið orðið fyrir meiðslum.

Ekki leyfa barni að sofa í matarstólnum.

Vertu meðvitaður um að stóllinn getur oltið ef barn nær að spyrna fótunum við matarborð eða annan fastan hlut.

Ekki skilja barnið eftir eftirlitslaust í matarstólnum.

Neytendur eru hvattir til að vera vakandi fyrir öryggisstöðlum við kaup á matarstól fyrir börn og tryggja að þeir uppfylli allar viðeigandi öryggiskröfur. 

Samræmd starfsemi um öryggi vöru (CASP) gerir öllum markaðseftirlitsyfirvöldum ríkja EU/EES kleift að vinna saman að því að efla öryggi vara sem settar eru á innri markað Evrópu. Ísland var eitt af 11 ríkjum sem tók þátt í slíku verkefni á síðasta ári sem snéri að matarstólum fyrir börn. Alls voru 60 matarstólar prófaðir samkvæmt evrópska öryggisstaðlinum EN 14988:2017 + A1:2020. 

Niðurstöðurnar sýndu að 48 af 60 stólum (80%) stóðust ekki prófun. Þegar frávik vegna merkinga (kafli 9 í staðlinum) voru undanskilin, reyndust 24 stólar (40%) ekki uppfylla kröfur. Ísland sendi 5 matarstóla til prófunar og féllu þeir allir. Þrír stólar féllu einungis á merkingum, viðvörunum og leiðbeiningum en hinir tveir féllu einnig efnislega.

Nú þegar hefur verið brugðist við þessum ágöllum. Innkalla þurfti einn stól þar sem hann var talin sérstaklega hættulegur þar sem hann féll á stöðugleika.

Prófanir á matarstólum fyrir börn

Notkunarleiðbeiningar á íslensku skulu fylgja lækningatækjum. Leiðbeiningar mega vera á ensku eða einu af skandinavísku málunum utan finnsku ef um er að ræða áhættuminni lækningatæki.  

Notkunarleiðbeiningar eru gefnar út til að tryggja rétta notkun á lækningatækjum. 

Þeir sem beita lækningatæki í þágu annarra þurfa að hafa fengið þjálfun í notkun þess til að tryggja öryggi sjúklinga. 

Hægt er að tilkynna um atvik vegna lækningatækja til Lyfjastofnunar. Nota skal Mínar síður á vef stofnunarinnar eða senda póst á medicaldevices@lyfjastofnun.is 

Lækningatæki eiga að vera CE merkt. Til að staðfesta CE merkingu eiga innflytjendur og dreifingaraðilar tækja  að kalla eftir ESB-samræmisyfirlýsingu sem framleiðandi lækningatækisins gefur út.  Ef framleiðandi hefur ekki gefið út ESB samræmisyfirlýsingu fyrir lækningatæki sem  fyrirtæki hans framleiðir, er tækið ekki CE merkt. 

Lyfjastofnun hefur eftirlit með lækningatækjum, öryggi þeirra og réttri notkun. Markmið eftirlitsins er að koma í veg fyrir að þau sem á þurfa að halda verði fyrir tjóni, og tryggja að framleiðsla, viðhald og notkun lækningatækja sé í samræmi við bestu fagþekkingu á hverjum tíma. 

Lækningatæki eru af margvíslegum toga en einkennast af því að hafa læknisfræðilegan tilgang og vera markaðssett sem slík. Dæmi um lækningatæki sem hægt er að nálgast í apótekum og ýmsum almennum verslunum eru sjálfspróf, s.s. þungunarpróf og COVID-19 próf, plástrar og teygjubindi, hitamælar og gervitár. Lækningatæki sem ekki hafa læknisfræðislegan tilgang eru einnig á markaði,  s.s. fylliefni og augnlinsur. 

Lækningatæki

Niðurstaða prófanna í CASP verkefninu má sjá hér:         

Rafrettur sem mældust með of mikið magn nikótínvökva   

·   Reymont Meta I Blue Sour Raspberry (Fairvape)   

·      Trix Crystal – Watermelon (Fairvape)  

·      Waka soPro PA 600 Blueberry Raspberry (Djákninn) 

·      Aroma King Bar Cool Mango (Skýjaborgir)   

·      Frunk Bar Watermelon Splash (Svens)

Rafrettur sem mældust með ófullnægjandi barnavörn

·      Roar Strawberry Cherry Raz (Dufland)

Í fyrra tók HMS þátt í evrópska prófunarverkefninu CASP 2024 á einnota rafrettum. Keyptar voru tíu rafrettur af handahófi í verslunum á landinu og sendar í prófun í Danmörku. Það sem prófað var m.a. barnheldni, hættuleg efni í vökva og útblæstri, magn nikótínvökva og styrkur nikótíns í græjunni.

Skemmst er frá því að segja að sjö af tíu rafrettum féllu á prófunum. Alls féllu fimm rafrettanna á magni nikótínvökva og tvær varanna á ófullnægjandi barnheldni. Þessar vörur voru fjarlægðar af markaði og eftir atvikum fargað.  

70% fall einnota rafretta í prófunum

Lestu og fylgdu leiðbeiningum á umbúðum skoteldsins.

Notaðu öryggisgleraugu. Verndaðu augun þín,  þau eru viðkvæm og slysin geta verið alvarleg.

Virtu fjarlægðarmörk. Gakktu úr skugga um að allir séu í öruggri fjarlægð.

Bíddu með áfengi þar til eftir sprengingar. Dómgreindarskortur vegna áfengis hefur oft leitt til slysa.

Sprengjur eru ekki fyrir börn. Fullorðnir bera ábyrgð á að fylgjast með og leiðbeina.

Ef skoteldur virkar ekki: Bíddu í 15 mínútur og helltu þá vatni yfir hann.

Ekki kveikja á skoteld í höndum ef skoteldurinn er ekki með handfang, eins og stjörnuljós og handblys

Öryggi skiptir máli!
Auðveldasta leiðin til að koma í veg fyrir slys er að fylgja leiðbeiningum á umbúðum. Þar finnur þú mikilvægar upplýsingar um hvernig á að kveikja í flugeldinum, réttar fjarlægðir frá áhorfendum, mannvirkjum og gróðri, og hvað skal gera ef flugeldurinn virkar ekki.

Notkun öryggisgleraugna ætti að vera sjálfsagður hlutur. Margir hafa misst sjónina í flugeldaslysum.

Forðastu slysin – haltu þér edrú.
Mörg slys eiga sér stað þegar fólk hefur drukkið of mikið áður en það byrjar að sprengja. Ef þú getur ekki beðið með að fá þér áfengi er best að sitja hjá og njóta sýningarinnar í öruggri fjarlægð.

Mundu aldurstakmarkanir.
Skoteldar eru hættuleg sprengiefni og eru ekki fyrir börn. Jafnvel saklaus stjörnuljós geta verið hættuleg, þar sem þau brenna við um 1000 °C.

Allsgáður og ábyrgur fullorðinn einstaklingur ætti alltaf að hafa eftirlit með börnum þegar þau nota flugelda. HMS óskar þér og þínum öruggra og gleðilegra áramóta!

Það er mikilvægt fyrir neytendur að vita að flugeldar eiga að vera CE-merktir. CE-merkingin tryggir að varan uppfylli evrópskar öryggiskröfur.

Hversu marga flugelda ætlar þú að skjóta upp í ár?
Þú veist vonandi hvernig á að meðhöndla sprengiefni á öruggan hátt, ekki satt? Við notkun flugelda er margt sem þarf að hafa í huga.

HMS hefur tekið saman nokkur lykilatriði sem hjálpa þér og þínum að hefja nýja árið slysalaust

Flugeldar um áramót

Þessar athugasemdir eru mikilvægar þar sem þær geta haft áhrif á öryggi neytenda. Þegar kerti uppfylla ekki allar kröfur um viðvaranir og merkingar, eru notendur í meiri hættu á að verða fyrir slysum. Það er því mikilvægt að framleiðendur og söluaðilar tryggi að allar merkingar séu réttar og í fullu samræmi við lög, til að vernda neytendur og tryggja að vörurnar séu öruggar í notkun.

HMS leggur áherslu á mikilvægi þess að allar merkingar séu skýrar og greinilegar við kaup, hvort sem er í verslunum eða á netinu. Réttar og sýnilegar upplýsingar eru lykilatriði til að tryggja öryggi neytenda og koma í veg fyrir slys eða ranga notkun.

HMS hvetur alla framleiðendur, innflytjendur og söluaðila til að yfirfara vörur sínar og tryggja að þær uppfylli lögbundnar kröfur um merkingar.

Kerti eiga að hafa viðeigandi merkingar um framleiðanda og varúðarráðstafanir. 

Ef það vantar upplýsingar á merkimiða, getur það verið vísbending um að vara sé ekki fullkomlega örugg og að öllum líkindum ekki framleidd eftir staðli.

Húsnæðis- og Mannvirkjastofnun (HMS)

Húsnæðis- og mannvirkjastofnun (HMS) framkvæmdi nýverið úttekt á merkingum kerta til að meta hvort þær uppfylli meðal annars kröfur um viðvaranir og notkunarleiðbeiningar. Í úttektinni voru skoðuð alls 49 tegundir kerta frá fimm mismunandi söluaðilum.

Niðurstöður úttektarinnar leiddu í ljós að meirihluti kerta uppfyllti ekki kröfur um viðeigandi merkingar. Af þeim 49 kertum sem voru skoðuð, fengu 26 athugasemdir, sem samsvarar 53% af öllum skoðuðum kertum. Þetta bendir til þess að stór hluti kertana eru ekki í samræmi við öryggis- og upplýsingakröfur sem lagðar eru á framleiðendur og söluaðila.

Algengasta athugasemdin var vöntun eða röng öryggisviðvörun um að „Aldrei skal fara frá brennandi kerti“, sem er ein af lykilmerkingunum sem ætlað er að vernda notendur fyrir eldsvoða og öðrum hættum sem kunna að stafa af notkun kerta. Einnig kom í ljós að oft vantaði rekjanlegt vörunúmer, sem er nauðsynlegt til að hægt sé að rekja uppruna og framleiðslu vöru. Þetta getur gert það erfiðara að komast að því hvort vara hafi verið framleidd í samræmi við gæðastaðla og öryggiskröfur.